Elordada Mahambettiń kúıleri oryndalmaq
NUR-SULTAN. QazAqparat – Elordada Mahambet Ótemisulynyń týǵanyna 215 jyl tolýyna oraı «Qaıran Naryn» atty kontsert ótedi, dep habarlaıdy QazAqparat.
3 qyrkúıekte «Astana» kontsert zalynda ótetin kontsertte Mahambettiń barlyq kúıleri oryndalady. Sonyń ishinde «Shilterli tereze», «Joryqta», «Qaıran Naryn», «Qıly kezeń», «Jumyr qylysh», «Ókinish» atty kúıleri bar. Aıta ketý kerek, Mahambettiń atalǵan kúılerin orkestrge arnap notaǵa túsirgen kompozıtor Aıtqalı Jaıymov. Sonymen birge osy kontserttiń baǵdarlamasyna engen «Aq jeleń» jáne «Isataıdyń Aqtabany-aı» kúılerin kompozıtor Erkin Nurymbetov notaǵa túsirgen bolatyn.
Kontsertte daýylpaz aqynnyń keıbir týyndylaryn jetkizýde tanymal dombyrashylar sheberlikterin tanytatyn bolsa, endi birqataryn orkestr oryndaıdy.
Sonymen qatar kontserttiń tartymdylyǵyn arttyra túsý maqsatynda shaǵyn mýzykalyq kórinis qoıylady. Onda kúıshi Qurmanǵazy men aqyn Mahambettiń kezdesý sáti beınelendi.
Osy keshte M.Ótemisulynyń óleńine jazylǵan ánder de shyrqalady.
Orkestr dırıjeri – Nur-Sultan qalasy memlekettik akademııalyq fılarmonııasynyń Qazaq halyq aspaptary orkestriniń kórkemdik jetekshisi jáne bas dırıjeri Aıtqalı Jaıymov. Sondaı-aq osy kontsertte Mádenıet qaıratkeri Nurlan Bekenov pen Álisher Qasqyrbaı dırıjerlik etedi.
«Mahambettiń qazaq tarıhynda, ádebıeti men mádenıetinde alatyn róli óte zor. Ol kezinde ádilettilik úshin kúresken batyr, órshil óleńimen halyqtyń rýhyn kótergen. Sondaı-aq onyń kúıshilik óneri de óte ǵajap. Eshkimge uqsamaıdy. Kúıleri ekpindi, daýyldy, qaıratty bolyp keledi. Tyńdap qarasańyz, árbir kúıiniń óne boıynda úlken kúsh bar ekenin baıqaısyz. Bizdiń shyǵarmashylyq ujym ónersúıer qaýymǵa maýsymashar kontsertinde osyndaı kúı keshin usynyp otyr»,- dedi Aıtqalı Jaıymov.
