Elordada «Mahabbatym - Astana!» festıvali ótedi
ASTANA. QazAqparat - 4 shilde kúni saǵat 11.00-de M.Ótemisov atyndaǵy Oqýshylar saraıynyń alańynda ótetin Qala kúni aıasyndaǵy «Mahabbatym - Astana!» merekelik festıvaliniń negizgi ıdeıasy - eńbektegen baladan eńkeıgen qartqa deıin ortaq Astanany tamasha túrlendirý, barlyq turǵyndarǵa erekshe merekelik tartý jasaý.
Ár qalanyń ózine tán damý tarıhy men qaıtalanbas qoltańbasy bar. Astana kelbetin onyń jas ǵumyry men qazirgi kúni jáne erteńgi bolashaǵy sıpattaıdy. Osynda ómir súrip jatqan árbir adamnyń taǵdyry Astana tarıhymen tyǵyz baılanysty. Festıvalǵa «Astana qurdastary» raýtynyń jeńimpazdary - mektepke deıingi lagerler, oqýshylar saraıynyń shyǵarmashylyq ujymdarynyń balalary qatysady. Festıval aıasynda kontserttik baǵdarlamalar, Oqýshylar saraıynyń jazǵy alańynda úlken qutparaq jasaý josparlanǵan.
Sondaı-aq Oqýshylar saraıynyń tálimgerleri «Astana - álemniń jańa qalasy» teatrlandyrylǵan kirispesine qatysyp, mereke kórigin qyzdyra túspek. Sonymen qatar festıvalde «Astana qurdastary» qalalyq baıqaýynyń jeńimpazdaryn saltanatty marapattaý rásimi ótedi.
Mereke sońynda ulttar men ulystar arasyndaǵy túsinistik, seriktestik pen yntymaqtastyq ahýaly bı ujymdarynyń «Dostyq bıi» ónerinen kórinis tappaq.
