Elordada LRT qurylysy belgilengen merziminde aıaqtala ma

Astana qalasynyń ákimi Jeńis Qasymbek elorda kóshelerindegi kólik keptelisin azaıtý úshin qandaı sharalar qolǵa alynǵanyn málim etti, dep habarlaıdy Kazinform.

«LRT jumystary bıyl bastaldy, endi bizdiń josparymyz boıynsha 2,5 jyl ishinde qurylys aıaqtalady. Bul kólik keptelisi máselesin sheshýge úlken úles qosady dep esepteımiz. Bıyl ál Farabı – Táýelsizdik dańǵyldarynyń qıylysynda jańa kópir saldyq. Ol Túrkistan, Aqmeshit kósheleri men Máńgilik el dańǵylyndaǵy kólik keptelisin 15-20 paıyzǵa azaıtty» - dep jaýap berdi ákim búgin Ortalyq kommýnıkatsııalar qyzmetinde tilshi suraǵyna.

Kelesi úlken kópir – Redısson qonaq úıi men M. Nárikbaev ýnıversıtetiniń arasynda salynady. Onyń qurylysy kúzde bastalyp, eki jylda aıaqtalady. Ol Qorǵaljyn tasjoly men Turan dańǵylyndaǵy keptelisti azaıtady.

«Sondaı-aq kelesi jyly Qabanbaı batyr dańǵylyna shyǵatyn Táýelsizdik dańǵylynyń jalǵasy salyna bastaıdy. Sh. Aıtmatov kóshesiniń ashylýy Syǵanaq kóshesi men Uly dala dańǵyly arasyndaǵy Turan dańǵylyndaǵy kólik júktemesin aıtarlyqtaı tómendetti, bul kólik júktemesiniń 12% tómendeýine ákeldi. Sonymen qatar shaǵyn aınalma joldyń qurylysy júrip jatyr», - dedi Jeńis Qasymbek.