Elordada lombard tonaǵan kúdikti qolǵa tústi
NUR-SULTAN. QazAqparat- Elordadaǵy lombardtardyń birin tonady degen kúdikpen Aqmola oblysynyń turǵyny ustaldy, dep habarlaıdy QazAqparat tilshisi qalalyq polıtsııa departamentine silteme jasap.
Nur-Sultan qalalyq polıtsııa departamenti Krımınaldyq polıtsııa basqarmasynyń aqparatyna sáıkes, 3 sáýir kúni polıtsııaǵa belgisiz adam habarlasyp, túski as ýaqytynda Gete kóshesiniń boıyndaǵy lombardqa kirip, qyzmetkerin qarýǵa uqsas zatpen qorqytý arqyly aqsha berýin talap etkenin habarlaǵan. Ol aqshany alǵannan keıin qylmys ornynan ketip qalǵan.
«Atalǵan qylmysty ashý úshin elordalyq departamenttiń jeke quramy men qoǵamǵa baǵdar jiberildi. 5 sáýir kúni shamamen saǵat 17:00-de tártip saqshylarynyń jedel ári úılesimdi is-qımyly jáne azamattardyń járdemimen atalǵan qylmysty jasady degen kúdikke ilikken Aqmola oblysynyń turǵyny ustaldy. Kúdiktiniń aıtýynsha, ol buǵan deıin atalǵan lombardta bolyp, kúzettiń joq ekenin baıqaǵan jáne qylmysyn josparlaǵan. Sotqa deıingi tergeý amaldary júrgizilip jatyr. Zattaı aıǵaqtar tárkilendi», - dep atap ótti departamentten.
Vedomstvo málimetinshe, kúdiktiniń buǵan deıin de osyǵan uqsas qylmys jasaǵany anyqtalǵan.
«Onyń buǵan deıin jasalǵan ózge qylmystarǵa qatysy tekserilip jatyr. Atalǵan azamattyń zańǵa qaıshy áreketinen zardap shekken azamattardy Nur-Sultan qalalyq polıtsııa departamentine myna mekenjaı nemese telefon nómirleri arqyly júginýin ótinemiz: Beıbitshilik k. 19, (7172) 71-61-51; 71-66-40 ne 102 nómiri»,- deıdi vedomstvodan.
