Elordada lıftide balany pyshaqtaǵan jasóspirimdi urǵany ras pa – mınıstr jaýaby

ASTANA. KAZINFORM – Densaýlyq saqtaý mınıstri Aqmaral Álnazarova qoǵamdy dúr silkindirgen oqıǵaǵa qatysty pikir bildirdi. 

- Sot-medıtsınalyq saraptama júrgizilip jatyr, oqıǵa ornyna arnaıy komıssııa bardy. Atalǵan fakti rastalmady, biraq ákimshilik bul jaǵdaıǵa obektıvti baǵa berýge múddeli. Sondyqtan sot-medıtsınalyq saraptamanyń nátıjesi boıynsha qosymsha túsinikte beremiz, - dedi Aqmaral Álnazarova atalǵan jaıtqa qatysty túsinik bere turyp. 

Mınıstrdiń aıtýynsha, bolǵan jaıtqa qatysty aldyn ala málimetter boıynsha fakti rastalmady. 

Aıta ketsek, elordada kópqabatty turǵyn úılerdiń birinde lıftide balany pyshaqtaǵan jasóspirimniń anasy psıhıkalyq densaýlyq ortalyǵynda ulyn urǵany týraly polıtsııaǵa shaǵym túsirgen edi.

Eske sala keteıik, 11 aqpanda elordada jasóspirim lıfti ishinde balany pyshaqtap tastaǵan edi. Keıin belgili bolǵandaı pyshaqpen shabýyldaǵan jasóspirim arnaıy esepte turǵan.  

Dárigerler zardap shekken balaǵa dereý ota jasap, psıhologııalyq kómek kórsetti. 

Qazir balany pyshaqtaǵan jasóspirim psıhıatrııalyq statsıonarda. 

Óz kezeginde Densaýlyq saqtaý mınıstriniń orynbasary Erjan Nurlybaev jasóspirimniń ortaǵa beıim jaǵdaıda bolǵanyn aıtty. 

Sondaı-aq keıin anyqtalǵandaı lıftide balany pyshaqtaǵan jasóspirimdi jalǵyzbasty ana tárbıelep otyr.