«Elordada LGBT-qaýymdastyǵy músheleri májbúrlep tirkelýde»: Aqparatqa túsinik berildi
NUR-SULTAN. QazAqparat - Nur-Sultan qalasynda LGBT-qaýymdastyǵy múshelerin májbúrlep jáne jappaı tirkeý bastaldy. Áleýmettik jelide taraǵan osy aqparatqa qatysty Polıtsııa departamenti túsinik berdi, dep habarlaıdy QazAqparat stopfake.kz saıtyna silteme jasap.
Taraǵan aqparatqa sáıkes, jynystyq azshylyq ókilderin «pedofılııa úshin qylmystyq jaýapkershilik týraly eskertilgeni týraly qolhat jazýǵa, jeke derekteri bar saýalnamany toltyrýǵa, sondaı-aq saýsaq izderin tapsyrýǵa májbúrleıdi» eken. Keıbir jaǵdaılarda tólqujattan basqa, ózimen birge taǵy eki «tólqujattyq» fotosýret bolýy kerek-mys.
«Maqalada kórsetilgen dálelder shyndyqqa sáıkes kelmeıdi. Rastalmaǵan málimetterdi qasaqana taratqan adamdar anyqtalyp, jaýapkershilikke tartyldy. Nur-Sultan qalasynyń Polıtsııa departamenti azamattardy resmı derekkózderge ǵana senýge shaqyrady jáne kórineý jalǵan aqparat taratqany úshin qylmystyq jaýapkershilik qarastyrylǵanyn eskertedi», – dep habarlady vedomstvodan.
Sondaı-aq, «Kok Team» birlestiginiń paraqshasynda ózderin polıtsııa qyzmetkerleri retinde tanystyrǵan bopsalaýshylar men alaıaqtar osy shema boıynsha jumys isteıtini jazylǵan.
«Eger sizge sýrette jazylǵandaǵydaı sózder aıtylsa (Qazaqstanda geılerdi tirkeý týraly – avt.), senbeńiz – bul aqsha bopsalaý joly. Sizge osyny aıtqan adam – qylmysker (onyń ne jáne qalaı aıtqanyna baılanysty bopsalaý nemese alaıaqtyq bolyp tabylady). Eger olar qaıta habarlasatyn bolsa, polıtsııaǵa, prokýratýraǵa aryz beremin jáne quqyq qorǵaýshylardy habardar ettim (tipti olaı bolmasa da) dep jaýap berińiz, – dep eskertedi belsendiler .
Qazaqstanda LGBT ókilderi zańmen qýdalanbaıdy. Geılerdi mindetti túrde tirkeý týraly habarlama – jalǵan.
Eske salaıyq, Qazaqstanda karantın kezinde LGBT qaýymdastyǵyna múshelikke ótken jasóspirimder sany artqany habarlanǵan bolatyn.
