Elordada Lev Gýmılevke eskertkish ornatylady
ASTANA. 8 qazan. QazAqparat - Búgin Astanadaǵy L.N.Gýmılev atyndaǵy Eýrazııa ulttyq ýnıversıtetinde «L.N.Gýmılev muralary jáne qazirgi Eýrazııalyq yntymaqtastyq» atty taqyrypta ІH Halyqaralyq Eýrazııalyq ǵylymı forým ótedi.
Forýmnyń negizgi maqsaty: L.N.Gýmılev muralaryna jańashyl kózqaraspen qarap, ıntellektýaldy turǵydan baǵa berý jáne ártúrli pikir týǵyzyp júrgen máselelerdi ataqty ǵalymdardyń talqysyna salý, pikirtalas týdyrý arqyly eýrazııalyq ıdeıa Eýrazııa halqynyń ıntegratsııalyq baspaldaqtarynyń negizi ekenin búkil álemge pash etý. Ǵalymdar plenarlyq májiliske qatysyp, 5 sektsııa boıynsha jumys júrgizbek. Negizgi taqyryby - Eýrazııadaǵy kóshpendilerdiń damýy: tarıhy men mádenıeti; Eýrazııa halqynyń shyǵý tegi men tarıhynyń problemalary jáne ǵalym muralarynyń ǵylymı zerttelýi; Lev Gýmılev muralary: psıhologııalyq-pedagogıkalyq, áleýmettik-fılosofııalyq aspektiler; eýrazııalyq ıntegratsııanyń bolashaǵy men qazirgi deńgeıi.
Belgili ǵalym, tarıhshy-etnolog, tarıh jáne geografııa ǵylymdarynyń doktory, aqyn, aýdarmashy Lev Gýmılevtiń týǵanyna 100 jyl tolýyna oraı Eýrazııa ulttyq ýnıversıtetiniń rektory Erlan Sydyqovtyń jetekshiligimen toptama kitaptar serııasy jaryqqa shyqty.
Aıta keteıik, L.N.Gýmılevtiń 100 jyldyǵyna oraı ýnıversıtet aýlasynan uly ǵalymnyń eskertkishi boı kótermekshi.
«1996 jyldyń mamyrynda Eýrazııalyq ýnıversıtetti Astanada qurý týraly Jarlyqty bekitip, jańa ulttyq joǵary oqý orny L. Gýmılev atymen ataldy. Bul kezdeısoq oqıǵa emes. Ǵalymnyń 100 jyldyǵyna arnalǵan forým Lev Gýmılevtiń ózi kótergen ómirlik fılosofııalyq qundy baǵyttarǵa negizdelgen», - dedi E. Sydyqov.
Jaqyn arada elordada ǵalymǵa arnalǵan eskertkish paıda bolatynyna toqtalǵan ol, «qazirgi kezde L. Gýmılev eskertkishi daıyndaldy jáne taıaýda ornatylady. Biz baıqaý ótkizip, eń úzdik jobany iriktedik», - dep túıindedi rektor.
