Elordada Land Cruiser kóligimen balany qaǵyp óltirgen áıeldiń isi boıynsha sot qazan aıynyń ortasynda bastalady
ASTANA. QazAqparat - Astanada adam ólimine ákelip soqtyrǵan is boıynsha sot tyńdaýy 12 qazanda bastalady, dep habarlaıdy qalalyq sottyń baspasóz qyzmetinen.
Astana qalasyndaǵy №2 Almaty aýdandyq soty QR QK-niń 345-babynyń 3-bóligimen («jol qozǵalysy erejelerin buzý nemese kóliktik quraldardy paıdalanýshy tulǵalardyń kóliktik quraldardy paıdalaný erejelerin buzý») qarastyrylǵan qylmysty jasaǵany úshin aıyptalyp otyrǵan azamatshaǵa qatysty qylmystyq isti qarastyryp jatyr.
Atalǵan is boıynsha sot otyrysy 2015 jyldyń 12 qazanyna belgilengen.
Eske sala keteıik, 25 mamyr kúni kúndizgi saǵat 12-niń shamasynda Astana qalasynyń 32 jastaǵy turǵyny Toyota Land Cruiser Prado markaly kólikpen Imanov kóshesimen júrip kele jatyp, Qajymuqan-Sátbaev kósheleriniń qıylysynda oń jaqqa burylarda jaıaý júrginshilerge arnalǵan jolmen kele jatqan 11 jasar balany qaǵyp ketti. Jol-kólik apaty saldarynan jasóspirim alǵan jaraqattarynan oqıǵa ornynda kóz jumdy.
