Elordada qyzmettik mindetterin oryndaý barysynda mert bolǵan ishki ister organdary qyzmetkerlerine taǵzym etildi
ASTANA. QazAqparat - Polıtsııa kúnin merekeleý aıasynda búgin QR Іshki ister mınıstri Qalmuhanbet Qasymovtyń qatysýymen qyzmettik mindetterin oryndaý barysynda qaza tapqan ishki ister organdarynyń qyzmetkerleri men ishki áskerdiń áskerı qyzmetshilerine arnalǵan monýmentke gúl shoqtaryn qoıý rásimi ótti.
Negizgi shara aıaqtalǵannan keıin Іshki ister mınıstri QR ІІM oqý oryndarynyń túlekterine leıtenat pogondaryn tabys etti.
«Qurmetti áriptester, qurmetti ardagerler, men sizderdi kásibı merekelerińizben quttyqtaımyn! Mine, birneshe kúnnen beri osynaý ataýly data elimizdiń barlyq óńirinde atalyp ótilýde. Bizdiń tarıhymyzdyń árbir kezeńiniń óz qıyndyqtary boldy. Biraq, biz oǵan tótep berdik. Osy rette bizdiń aradagerlerimizge zor eńbekteri úshin alǵysymdy bildiremin», - dedi Q.Qasymov.
Aıta keterligi, Іshki ister mınıstriniń buıryǵymen birqatar polıtsııa qyzmetkeri «Quqyq tártibin qamtamasyz etýge qosqan úlesi úshin» medalimen marapattaldy.
Bıyl Qazaqstan polıtsııasynyń qurylǵanyna 23 jyl tolyp otyr. Táýelsizdik jyldary ishinde 900-den astam polıtsııa jáne Ulttyq gvardııa qyzmetkeri qyzmettik boryshyn abyroımen atqarǵany úshin memlekettik nagradalarmen marapattaldy. Olardyń 95-ine nagrada qaza tapqannan keıin berildi.
