Elordada qyzmet etetin meıirbıkelerdiń kásibı daıarlyǵy tıisti deńgeıde emes - densaýlyq saqtaý basqarmasy
ASTANA. QazAqparat - Elordada qyzmet etetin meıirbıkelerdiń kásibı daıarlyǵy tıisti deńgeıde emes. Bul týraly búgin bıylǵy 9 aıdyń qorytyndysy boıynsha Meıirbıkelik isti damytý boıynsha úılestirýshi keńestiń otyrysynda Astana qalasy densaýlyq saqtaý basqarmasy basshysynyń orynbasary Ivan Lı málim etti.
«Búginde bizde meıirbıkelerdiń kásibı daıarlyǵy óte tómen jáne bul bizdiń basty problemamyz. Máselen, eńbek ótili bar meıirbıkelerdiń arasynda tıisti deńgeıde biliktiligi joq ekeni anyqtalyp jatady», - dedi I. Lı.
Onyń sózine qaraǵanda, elordadaǵy meıirbıkelerdiń kásibı biliktiliginiń statıstıkasy nashar. Astanada daıarlyǵy birinshi jáne joǵary sanattaǵy meıirbıkeler óte az.
«Elorda úshin bundaı kórsetkish laıyqty emes. Shetelde, onyń ishinde Germanııada nemese Izraılde joǵary meıirbıke bilimi medıtsınalyq qyzmetkerdiń joǵary mártebesine teń. Olar otbasylyq medıtsına aıasynda jumys isteıtin negizgi medıtsınalyq qyzmetkerler bolyp tabylady», - dedi I. Lı.
