Elordada qyz balalarǵa arnalǵan hokkeı sektsııasy ashylady
NUR-SULTAN. QazAqparat - Elorda ákimi Altaı Kólginov qala turǵyndary arasynda buqaralyq sportty nasıhattaý boıynsha ákimdiktiń júrgizip jatqan jumysy týraly aıtty, dep habarlaıdy QazAqparat qala ákimdigine silteme jasap.
«Qazaqstannyń 100 jańa esimi» jobasynyń árbir jeńimpazynyń óz tarıhy bar. Olar - elimizdiń talantty ári qoıǵan maqsatyna jete alatyn tulǵalary. Joba ókilderiniń arasynda ártúrli salada qyzmet etetin adamdar bar. Olardyń qatarynda erekshe qajettiligi bar balalarmen jumys isteıtin reabılıtolog, álem ádebıetiniń aýdarmashysy, oqýshyǵa pándi túsindirip qana qoımaı, sonymen qatar olardyń júrekterinde pánderdi oqýǵa degen súıispenshilikti oıata alatyn muǵalimder de bar. Sondaı-aq robot tehnıkasy, ekologııa, medıtsına, zamanaýı óner, IT, ınjenerııa jáne sáýlet, ǵylym jáne ınnovatsııa, sport jáne t. b. salalardyń ókilderi de bar», - dedi elorda ákimi.
Altaı Kólginov AQSh hokkeı klýbynyń jattyqtyrýshysy bolǵan Bulbul Qartanbaımen kezdesken.
«Bul progressıvti jastardyń ádemi áńgimeleri ǵana emes, óz mysalynda múmkin emes eshteńe joq ekenin dáleldeıtin, óz tájirıbesimen bólisetin jáne jobalardy ómirde júzege asyratyn adamdar týraly.
Búgin AQSh hokkeı klýbynyń jattyqtyrýshysy bolǵan Bulbul Qartanbaımen kezdestim. Ol atalǵan sport túrindegi alǵashqy qazaqstandyq sportshy atanyp otyr. Bulbulmen yntymaqtastyq máseleleri talqylandy. Óz tarapymyzdan oǵan elordamyzda qyzdarǵa arnalǵan hokkeı sektsııasyn ashýǵa kómektesemiz», - dedi ákim.
Onyń aıtýynsha, sport - árqaısymyzdyń ómirimizde mańyzdy ról atqarady. «Qala turǵyndary arasynda buqaralyq sportty nasıhattaý úshin qajetti jaǵdaı jasaımyz: sport nysandaryn jóndeımiz, jańa sport keshenderin ashamyz, mysaly Elbasynyń tapsyrmasy boıynsha Qazaqstan jeńil atletıkalyq kesheni salyndy. Sondaı-aq qoǵamdyq keńistikter (saıabaq, skver, býlvar) men aýlalardy abattandyramyz, balalar men jasóspirimder sportyn, federatsııalaryn qoldaımyz. Osynyń barlyǵy sport nysandarynyń qoljetimdiligin arttyrýǵa, sol arqyly ózimizdiń bolashaq sport juldyzdarymyzdy jáne sapaly jattyqtyrýshy quramyn ósirýge, sondaı-aq qala turǵyndaryn buqaralyq sportqa baýlýǵa, elordamyzda halyqaralyq deńgeıdegi sporttyq is-sharalardy ótkizýge jáne t.b. múmkindik beredi», - dedi Altaı Kólginov .
