Elordada «Qys órnegi» shańǵy festıvali ótedi
ASTANA. QazAqparat - 25 aqpanda «EXPO-2017» halyqaralyq kórmesine arnalǵan «Qys órnegi» 17-shi shańǵy festıvali ótkiziledi. Bul dástúrli shańǵy jarysy - qystyń sońǵy senbisinde Esil ózeninde (Esil ózeniniń arnasy, Qabanbaı batyr dańǵyly, kópir, «Ramstor» SÚ) jáne qalalyq saıabaqtyń jaıaý júrginshiler kópirinde uıymdastyrylady.
«Festıvalge qatysýshylardy tirkeý saǵat 9.00-den bastalady. Jarysqa qatysýshylar túrli jas sanatynda 1 jáne 3 shaqyrym qashyqtyqqa shańǵy jarysy, shaǵyn fýtbol, hokkeı, beldesý, krıket, armrestlıng, gir kóterý, arqan tartý, muz astynda balyq aýlaý jáne motokross syndy sporttyń on túri boıynsha kúsh synasady», dep habarlaıdy qala ákimdiginiń saıty .
Bul kúni Esil ózeniniń arnasynda sport qalashyǵy boı kóteredi. Festıvaldi uıymdastyrýshylar - Astana qalasynyń Dene shynyqtyrý jáne sport basqarmasy jáne Astana qalasy ákimdiginiń Sporttyq-buqaralyq is sharalardy ótkizý dırektsııasy.
Ótken jyly shańǵy jarysyna 2 700-den astam adam qatysqan, onyń ishinde oqýshylar, stýdentter, áskerı qyzmetkerler, jastar, qala turǵyndary men zeınetkerler de bar. Dástúrli «Qys órnegi» festıvali - elordamyzdyń sporttyq ómirinde aıshyqty oqıǵa bolyp sanalady. Otbasymen, ujymmen taza aýada qysqy demalys uıymdastyrýǵa úlken múmkindik beredi.
