Elordada qys boıy 4,5 mln tonna kómir jaǵylady
NUR-SULTAN. QazAqparat – Jelsiz kúnderi Nur-Sultan qalasyn qoıý tútin basady. Bul týraly Nur-Sultan qalasy ákimi Altaı Kólginov halyqqa esep berý kezdesýinde aıtty, dep habarlaıdy QazAqparat tilshisi.
«Biz ekologııany oılaýymyz kerek. Qazirgi ýaqytta buǵan qatysty qıyndyq bar. Kún sýyq jáne jelsiz kúnderi qalany qoıý tútin basady. Osyndaı kórinis byltyr da bolǵan, bıyl da baıqalady. Bul adamnyń densaýlyǵyna zııan keltiredi. Qala turǵyndarynyń sany jyl ótken saıyn arta túsetinin eskersek, bul másele tereńdeı beredi», - deıdi Altaı Kólginov.
Ol qalaǵa gaz tartý bul máseleni sheshýge kómektesetinin aıtty.
«Qys mezgilinde 1-jylý elektr stantsııasy men 2-jylý elektr stantsııasy 3 mıllıon 800 myń tonna kómir jaǵady. Jeke sektorlar 500 myń tonna kómir jaǵady. Sonda qys boıy shamamen 4,5 mıllıon tonna kómir jaǵamyz. Bul – atmosferaǵa 40 myń tonna zııandy zattardyń bólinýi degendi bildiredi. Biz osymen tynystap jatyrmyz», - deıdi ol.
Sondaı-aq, ol aýa lastaıtyn zattardyń biri – kólikter ekenin aıtty.
«Kólikter sany jyl ótken saıyn kóbeıip kele jatyr. Biz bul týraly oılaýymyz kerek. Qalaǵa gaz tartý aýa lastanýynyń tórtten bir bóligin azaıtady. Kóbi gaz baǵasy týraly suraq qoıady. Qazir esepteý jumystary júrip jatyr», - deıdi qala ákimi.
