Elordada qyrkúıekten bastap sý 15-20 paıyzǵa qymbattaıdy
ASTANA. 19 shilde. QazAqparat - Aǵymdaǵy jyldyń 1 qyrkúıeginen bastap elordada sý baǵasy kóteriledi.
Osyǵan oraı búgin «Astana sý arnasy» mekemesi tutynýshylarǵa sý-káriz qyzmetteri tarıfiniń ósýi sebepterin túsindirýge arnalǵan dóńgelek ústel otyrysyn ótkizdi.
«2011 jyldyń 25 shildesinde Astana qalalyq tabıǵı monopolııalardy retteý departamentiniń buıryǵymen bizdiń kásiporynǵa saralanǵan tarıfterdiń shekti deńgeıi bekitilgen bolatyn. Onda tutynýshylardyń toby boıynsha jáne jekelegen sýdy esepteýdiń qurylǵylary bar jeke tulǵalardyń sýdy tutyný kólemi boıynsha tarıfter qarastyrylǵan. Osy buıryqqa sáıkes tarıfterdi jylsaıyn kezeń kezeńimen kóterý qarastyrylǵan. Aǵymdaǵy jyldyń 1 qyrkúıeginen bastap sý 15-20, al 2013 jyldyń qyrkúıeginde 5 paıyzǵa qymbattaıdy», - dedi «Astana sý arnasy» memlekettik kommýnaldyq kásiporynynyń bas dırektory Ýálıhan Dosaev.
Onyń atap ótýinshe, sýǵa saralanǵan tarıf buǵan deıin Almaty qalasynda ilki joba retinde engizilgen ári ol óte jaqsy áleýmettik-ekonomıkalyq nátıjeler kórsetken.
Sondaı-aq bas dırektordyń aıtýyna qaraǵanda, mekemede 3 jylǵa arnalǵan ınvestıtsııalyq baǵdarlama júzege asyrylýda. Onyń aıasynda birqatar stansalardy, sý jáne káriz júıelerin jańartý kózdelgen.
«41 arnaıy mamandandyrylǵan tehnıka satyp alamyz. Jalpy osy jyly baǵdarlama aıasynda 44,1 mlrd. teńge qarastyrylǵan. Tek osy jyldyń ishinde ǵana 1 mlrd. teńge ınvestıtsııalyq jobalardy júzege asyrýǵa bólingen. Qazirgi kúni onyń 700 mln. teńgesi ıgerildi», - dedi ol.
