Elordada qyrǵyz sýretshisiniń jeke kórmesi ashyldy (FOTO)
ASTANA. QazAqparat - Astanada belgili qyrǵyz sýretshisi Dıas Ústemirovtyń «Kóshpendiniń jany men qanaty» atty jeke kórmesi ashyldy.
Elorda turǵyndary men qonaqtary maýsym aıynyń sońyna deıin D.Ústemirovtiń 60 jýyq týyndylarymen tanysa alady. Mádenı shara «Ramada Plaza» ǵımaratynda ornalasqan «Shejire» galereıasynda ótýde.
«Kóshpendiler órkenıetin eki nárse qurdy - ol adam jáne pyraq. Menińshe, biz arǵymaqty qatty áspetteýimiz kerek, ol bizdiń qanatymyz, rýhanı álemimizdiń tuǵyry», - deıdi sýretshi. Atalmysh sharaǵa QR Parlamenti májilisiniń depýtattary, qazaqstandyq sýretshiler men D.Ústemirovtiń týǵan-týystary men dostary keldi.
«At taqyryby kóshpendiler úshin jaqyn. Bul týyndylarymda dalanyń, Azııanyń, túrki áleminiń rýhy baıqalady. Men qazaq halqyna úlken rızashylyǵymdy bildirgim keledi. Meni jyly qarsy alyp jatqandaryńyzǵa qatty qýanyp otyrmyn», - dep atap ótti ol.
Sýretshi Dıas Ústemirov V.I.Sýrıkov atyndaǵy Máskeý memlekettik akademııalyq kórkemsýret ınstıtýtyn qondyrǵyly kórkemsýret fakýlteti boıynsha bitirgen. Búginde onyń týyndylary AQSh, Kanada, Frantsııa, Anglııa, Germanııa, Japonııa, Qytaı, Túrkııa, Malaızııa, Avstralııa syndy kóptegen memleketterde jeke kollektsııalarda saqtalýda.
Kórme 30 maýsymǵa deıin jalǵaspaq.
