Elordada qymbat kólikterdi tonaıtyn ury ustaldy
NUR-SULTAN. QazAqparat - Elordalyq polıtseıler qymbat kóliktiń shamdary men aınalaryn urlap ketip júrgen uryny qolǵa túsirdi. Іzin jasyrý úshin ury beınebaqylaý kameralaryn julyp áketip otyrǵan, dep habarlaıdy QazAqparat tilshisi.
«Ótken aptada túngi ýaqytta qymbat kólikterdiń shamdary men aınalardyń urlanýynyń birneshe faktisi tirkelgen edi. Taldaý jasaı otyryp, qylmystyq polıtsııa qyzmetkerleri avtokólikterdi tonaý qylmysy kóbirek tirkeletin aýmaqtardy nazarǵa aldy. Atalmysh qylmystardyń betin ashý úshin tártip saqshylary túnde reıd jumystaryn júrgizdi», - dep habarlaıdy qalalyq Polıtsııa departamentiniń baspasóz qyzmetinen.
Túngi reıd barysynda elordanyń 35 jastaǵy turǵyn qolǵa túsken.
«Ustalǵan azamattyń úıinen tártip saqshylary qymbat kólikterdiń 5 jup aldyńǵy jaryq berer shamyn, 18 aınasy men ózge de aksessýarlaryn anyqtady. Sonymen birge, ury qylmys jasaǵan jerlerden julyp áketken 9 beınebaqylaý kamerasy tabyldy. Qazirgi ýaqytta atalmysh fakti boıynsha sotqa deıingi tergeý amaldary júrgizilip jatyr. Onyń ózge de qylmystarǵa qatysynyń bar-joǵy anyqtalýda», - delingen habarlamada.
Tártip saqshylary kóligi tonalǵandar bolsa, «102» nómirine habar berýdi suraıdy.
