Elordada «Qylmystyq sot protsesindegi prokýrorlar qyzmetin jetildirý» atty respýblıkalyq semınar ótýde
ASTANA. Sáýirdiń 12-si. QazAqparat - Sáýirdiń 12-13-i kúnderi QR Bas prokýratýrasy janyndaǵy S.Esqaraev atyndaǵy Prokýratýra organdary qyzmetkerleriniń biliktiligin arttyrý, zańdylyq jáne quqyq tártibi problemalaryn zertteý ınstıtýty EQYU-nyń Astanadaǵy Ortalyǵymen birlesip, «Qylmystyq sot protsesindegi prokýrorlar qyzmetin jetildirý» atty respýblıkalyq semınar ótkizýde.
Bul aqparatty atalǵan ınstıtýtynyń baspasóz qyzmeti taratyp otyr.
Sharaǵa QR Bas prokýratýrasynyń salalyq bólimsheleriniń basshylary, RF prokýratýrasy, QR Bas prokýratýrasy janyndaǵy ınstıtýttardyń mamandary, Qazaqstan men Reseı halyqaralyq jáne úkimettik emes uıymdarynyń ókilderi qatysýda.
«Prokýratýra zańdylyq, quqyqtyq tártipti saqtaý jáne memleketpen azamattardyń múddesin qorǵaıtyn basty qadaǵalaýshy organ retinde quqyqtyq reformanyń alǵy shebinde bolýy tıis. QR Prezıdenti Nursultan Nazarbaevtyń 2010 jylǵy Joldaýynda quqyq qorǵaý organdary aldyna elimizdegi zańnamalyq áleýetti odan ári demokratııalandyrý jáne izgilendirý týraly naqty mindetter qoıyldy. Sondyqtan prokýratýra organdarymen óz qyzmetin ońtaılandyrý, jetildirý jáne prokýratýra qyzmetkerlerin jańa sapada qalyptastyrý úshin júıeli jumystar júrgizilýde», delingen baspasóz habarlamasynda.
Semınar aıasynda sot protsesindegi prokýrordyń qyzmetine qatysty ózekti máseleler; qylmystyq isti daıyndaý jáne taldaý, alqabılerdi daıyndaý, alqabıler qatysýymen ótetin sottaǵy tergeýge prokýrordyń qatysýy, qylmystyq isti taldaý jáne oǵan ustanym tańdaý, qylmysty jikteý jáne basqalary talqylanbaq.
