Elordada qylmystyq deńgeı qoldan birqalypty deńgeıde ustalyp turdy -Bas prokýratýra
ASTANA. 10 aqpan. QazAqparat - Dástúrli túrde jyl saıyn elordada tirkelgen qylmystar 4 myń deńgeıinde qoldan birqalypty deńgeıde ustalyp turdy.
Bul týraly búgin Astanadaǵy baspasóz máslıhatynda QR Bas prokýratýrasy Quqyqtyq statıstıka jáne arnaıy esepke alý jónindegi komıtetiniń tóraǵasy Marat Ahmetjanov málim etti.
Keńestik kezeńnen beri kele jatqan qylmysty jasyryp qalý dástúrine tosqaýyl qoıylyp otyrǵandyǵyna toqtalǵan tóraǵa, «bul búgingi kúnniń talabyna saı, múldem jańa kózqaras. Osy máselege osylaısha jańasha kelip, jurtshylyqtan kelip túsken barlyq aryz-shaǵymdardy tirkeýdiń ashyqtyǵyn qamtamasyz etip, memleketimizdiń tarıhynda alǵash ret elimizdegi qylmys deńgeıin shynaıy kórsetýge qol jetkizip otyrmyz»,-dedi. Bul turǵyda, ásirese, júıege jappaı engizilgen qylmysty elektrondy túrde tirkeý ádisi keńinen qoldanylyp otyr.
Onyń sózine qaraǵanda, Astanada sońǵy jyldary halyq sany jarty mln. adamǵa óskenine qaraı bul turǵyda qylmystyń deńgeıi de artýy tıis. Atap aıtqanda, eger elorda aýysqannan bergi ýaqyttan 2010 jyldyń aıaǵyna deıin Astanada halyq sany úsh ese artsa da qylmys deńgeıi 4 myń bolyp birqalypta saqtalǵan. Ótken jyldan beri elimizde qylmysty tirkeýdiń jetildirilgen jańa ádisi paıdalanylýda. «Osyǵan baılanysty Astanada ótken jyly 15 myńnan astam qylmys tirkeldi. Bul óz kezeginde úsh esege artyq. Bul naqty ahýalǵa saı málimetter».-dedi M. Ahmetjanov.
