Elordada KVI-diń ekinshi tolqynyna daıyndyq qandaı – basqarma basshysynyń jaýaby
NUR-SULTAN. QazAqparat – Elordada ókpeni jasandy jeldetý apparatynyń jalpy sany 434-ke jetkizildi. Bul týraly Antikor.live jobasynda Nur-Sultan qalasynyń Qoǵamdyq densaýlyq saqtaý basqarmasy basshysy Tımýr Muratov aıtty, dep habarlaıdy QazAqparat tilshisi.
«Qajet bolǵan jaǵdaıda biz bir ýaqytta 18 densaýlyq saqtaý nysanyn qaıta ózgertip, tósek-oryn sanyn 6 myńǵa deıin arttyra alamyz. Qalalyq ákimdik biraz jumystar júrgizdi. Biz ókpeni jeldetý apparatynyń sanyn kóbeıttik. Bastapqyda olardyń sany 185 bolsa, qazir olardyń jalpy sany 434-ke jetti. Qýanyshqa oraı, koronavırýstyń ekinshi tolqynyna daıyndyq jumystary óz jemisin berýde. Búgingi tańda juqpaly aýrýlar aýrýhanasynda jatqan 174 adamnyń 8-i ókpeni jeldetý apparatyna qosylǵan. Bul ambýlatorlyq jeliniń tıimdi jáne turaqty jumys isteıtindigin kórsetedi», - deıdi Nur-Sultan qalasynyń Qoǵamdyq densaýlyq saqtaý basqarmasy basshysy Tımýr Muratov.
Onyń aıtýynsha, qazirgi ýaqytta elordalyq mobıldi toptar antıkoagýlıanttar, dárýmender men antıpıretıkterdi úıge jetkizip beredi. Úsh kúndik baqylaý júrgizgen kezde dene qyzýy kóterilip ketken jaǵdaıda ǵana naýqas aýrýhanaǵa jatqyzylyp, qosymsha tekserýden ótedi.
«Qazirgi ýaqytta qalada 27 rentgen qondyrǵysy jumys isteıdi, onyń 11-i bıyl jańartyldy. Keıbir iri emhanada rentgen apparattarynyń sany eki esege artty. Qazir 19 kompıýterlik tomografııa jumys isteıdi. Eger naýqas klınıkaǵa óz betinshe júginse, ony fıltr kabınetinde qabyldaıdy. Eger naýqas 103 nómirine habarlassa, ony emhanaǵa baǵyttaıdy», - deıdi ol.
