Elordada kúıshi Janǵalı Júzbaevtyń «Qazaqtyń shertpe kúıleri» atty shyǵarmashylyq keshi ótti

Dáýlesker kúıshi Jan­ǵalı Júzbaev - búginde Astana ulttyq óner akademııasynyń dombyra kafedrasynda ustazdyq etedi. Qarataýdyń kıeli kúıshilik mektebiniń birden-bir murageri ózi biletin dúnıe­lerin, daryn­dardyń qoltańbasyn, sheberlik qaǵıdalaryn izin qýǵan jas býynǵa úıretýde. Sońǵy jyldary ol qazaq kúı ónerin tyń baǵytpen zertteýge den qoıyp keledi. «Qazaqtyń shertpe kúı­leri», «Shertpe kúıdiń tórt mekte­bi» atty zertteý eń­bekterin jáne «Ustazdyń pe­da­gogıkalyq reper­týary» atty kolledjge arnalǵan ádistemelik nota kitabyn jaryqqa shyǵardy. Qazaq kúıleriniń «Máńgilik saryn», «Qazaqtyń myń kúıi» an­tologııalaryna Qyzdarbek, Sembek, Itaıaq, Begimsal, Dáýletbek sııaqty halyq kompozıtorlary kúı­leriniń sırek oryndalatyn nus­qalaryn jazdyrdy. Sondaı-aq Janǵalı bul kúnde Súgir kúılerin túpnusqada tartatyn sheber kúıshi.

«Shertpe kúıdi óltirmeıtin, ózinen keıin shákirtterine jalǵastyryp beretin, úzbeıtin eń ataqty kúıshi, qazaqtyń mańdaıyna bitken syıy- Janǵalı Júzbaev. Men Janǵalı kúı tartqanyn kórgende, Súgirdi kórgendeı bolamyn, Tólegendi kórgendeı bolamyn. Men baıqaıtyn edim, Súgir de, Tólegen de keýdesimen tartatyn edi. Dombyrany qolymen shertedi, keýdesimen sóıleýshi edi. Janǵalı osyndaı qudyretti kúıshi»,-deıdi kózkórgen qaıratker, QR Prezıdenttik mádenıet ortalyǵynyń dırektory Myrzataı Joldasbekov.

Kesh barysynda Janǵalı Júzbaevtyń oryndaýynda Táttimbettiń kúıi - «Bestóre», Áshimtaıdyń kúıi - «Qońyrqaz», Tólegen Mombekovtyń kúıi - «Asý», Myrzataı Joldasbekovtyń kúıi - «Qosbasar», sondaı-aq Talasbek Ásemqulovtyń oryndaýynda Táttimbettiń kúıi - «Alshaǵyr-Shaǵan», Turar Álipbaevtyń oryndaýynda Qazanǵaptyń kúıi - «Kókil», Batyrlan Ábenovtyń oryndaýynda Nurǵısa Tilendıevtiń kúıi «Aqqý», Aqbota Turymbetovanyń oryndaýynda Janǵalı Júzbaevtyń - «Myrzataı» jáne taǵy da basqa kúıler oryndaldy.