Elordada kúıshi Orynbaı Dúısenniń «Uly kósh» atty keshi ótti
NUR-SULTAN. QazAqparat – Qazaq ulttyq óner ýnıversıtetinde osy bilim ordasynyń professory, Qazaqstannyń eńbek sińirgen qaıratkeri, kúıshi-dombyrashy Orynbaı Dúısenniń «Uly kósh» atty shyǵarmashylyq keshi ótti, dep habarlaıdy QazAqparat tilshisi.
El táýelsizdiginiń 30 jyldyǵy qarsańynda jýyrda jetpis jastyń bıigine shyqqan óner ıesi kórermenderge kúmbirlegen kúıden shashý shashty.
Kesh shymyldyǵy Orynbaı Dúısenniń «Uly kósh» atty mýzykalyq týyndysymen ashyldy. Nur-Sultan qalalyq fılarmonııasynyń qazaq halyq aspaptary orkestri oryndaǵan bul shyǵarma el ordasynyń Esil boıyna qonys aýdarýyna arnalǵan. QR mádenıet qaıratkeri Nurlan Bekenov dırıjerlik jasady.
Sondaı-aq orkestr mereıtoı ıesiniń «Qosbasar І-túri», «Tolǵaý», «Bapas», «Ánshi daýysy», «Qulager», «Altyn orda», «Baldyrǵan» atty kúılerin kópshilik nazaryna usyndy. Sonymen qatar avtordyń «Arman-aı», «Saıaly Alataý keshinde» ánderi de shyrqaldy.
Orynbaı Dúısenniń ózi Abyl, Qurmanǵazy, Súgir, Qazanǵap, Dına, Dáýletkereı, Táttimbet, Ábiken, Jantóre jáne basqa halyq kompozıtorlarynyń kúılerin tartyp, kórermenderdiń ystyq yqylasyna bólendi.
Osy keshte O.Dúısenge QR Mádenıet jáne sport mınıstrliginiń, Qazaq ulttyq óner ýnıversıtetiniń quttyqtaý hattary tabys etildi. Kúıshiler odaǵy «Halyq kúıshisi» ataǵyn berdi.
E.Rahmadıev atyndaǵy memlekettik akademııalyq fılarmonııasynyń qazaq halyq aspaptary orkestriniń kórkemdik jetekshisi, bas dırıjeri, QR eńbek sińirgen qaıratkeri Aıtqalı Jaıymov, «Kúı anasy» qorynyń jetekshisi Tólegen Qýanyshev sóz sóılep, Orynbaı Dúısenniń ustazdyq qyzmeti, ulttyq ónerdi nasıhattaýdaǵy eren eńbegi týraly taǵylymdy oılaryn ortaǵa saldy.
Aqyn, kompozıtor Slanqoja Qaraqystyq mereıtoı ıesiniń ómir joly jóninde mazmundy baıandama jasady. «Orynbaı Dúısen – 80-nen asa joǵary bilimdi mamandar, aspırant, magıstranttar daıyndaǵan tájirıbeli ustaz. Ol kúıdiń avtorlyq ereksheligin saqtap, eski kúılerdiń ozyq úlgileriniń túpnusqasyn buzbaı úıretý úrdisine erekshe kóńil bóledi. Onyń azamattyq ustanymy: qazaqtyń kúıshilik óneri – bir óńirdiń jekemenshigi emes. Kúı – qazaq halqynyń teńdesi joq ulttyq óner qazynasy. Osy qaǵıdany shákirtteriniń sanasyna sińirip keledi», - dep atap ótti.
Tyńdarman qaýymdy keremet sezimge bólegen mýzyka keshi Qurmanǵazynyń «Adaı» kúıimen aıaqtaldy.
Orynbaı Káriǵululy Dúısen 1951 jyly 6 qazanda Batys Qazaqstan oblysy, Shyńǵyrlaý aýdanynda dúnıege keldi. Qurmanǵazy atyndaǵy Almaty memlekettik konservatorııasynyń 1982 jylǵy túlegi. Osy óner ordasynda 1998 jylǵa deıin oqytýshy boldy. 1998 jyldan beri qaraı elordadaǵy Qazaq ulttyq óner ýnıversıtetinde ustazdyq qyzmet atqaryp keledi.
Fotosýretter – Ádilhan SAIRAN
