Elordada kúıshi-kompozıtor Nurlan Bekenovtiń «Kóńil sazy» shyǵarmashylyq keshi ótedi
NUR-SULTAN. QazAqparat – 16 sáýir kúni (saǵat 17-00) E.Rahmadıev atyndaǵy Elorda memlekettik akademııalyq fılarmonııasy qazaq orkestriniń dırıjeri, mádenıet qaıratkeri, kúıshi, kompozıtor Nurlan Bekenovtiń «Kóńil sazy» atty shyǵarmashylyq keshi ótedi, dep habarlaıdy QazAqparat tilshisi.
«Qazaqstan» ortalyq kontsert zalynyń kameralyq zalynda ótkeli turǵan bul basqosýda qazaqtyń dombyra aspaby jáne kúı óneri týraly syr shertiletin bolady.
–Dombyranyń bes buraýy týraly oılar ortaǵa salynady. ıAǵnı, shalys buraý, qalys buraý, tel buraý, oń buraý jáne teris buraý jóninde maǵlumattar berilip, osy bes buraýda kúıler oryndalady. Basty maqsatymyz – qazaq dombyrasynyń bes buraýyn nasıhattaý, halyqqa keńinen tanystyrý. Sonymen qatar dombyranyń túrleri jurtshylyq nazaryna usynylady. Onyń ishinde ulttyq aspabymyzdyń tumar dombyra, shińkildek dombyra, qalaq dombyra jáne qozyquıryq dombyra dep bólinetin tórt túriniń oryndaý erekshelikterin kórsetemiz. Buny árbir qazaqtyń bilgeni jón desek, al jas urpaq úshin mundaı qundylyqtarymyzdy bilip, kóre bilýi óte mańyzdy, - deıdi kúıshi-kompozıtor Nurlan Bekenov.
Bul keshte Qazaqstannyń eńbek sińirgen qaıratkerleri Amantaı Jumashev pen Anar Muzdahanova jáne «Qurmet» ordeniniń ıegeri Janar Júsipova óner kórsetedi.
Mádenıet salasynyń úzdigi Janar Qasymova jetekshilik etetin, bıyl qurylǵan «Boıtumar» qobyzshylar kvınteti, Qarlyǵa Nıhanbaeva jetekshiligimen «Jas óren» balalar ansambli jáne «Aqjanbek-Arys» dombyrashylar ansambli túrli dombyramen kúı oryndap beredi.
Aıta ketý kerek, Nurlan Bekenovtiń aqyn Taýbaı Saqtaǵanulyna arnaǵan «Aqyn armany nemese Taýbaı tolǵaýy» atty kúıi tuńǵysh ret kórermender nazaryna usynylmaq.
Sonymen qatar Aıtqalı Jaıymovtyń «Jeldirme», «Qosbasar» degen kúıleri kórermender nazaryna usynylmaq.
Qazaqstan Prezıdenti Qasym-Jomart Toqaevtyń ákesi – jazýshy Kemel Toqaevtyń «Uıasynan bezgen qus» romanynyń jelisinde shyqqan «Uıasynan bezgen qus» atty kúı sahnada alǵash ret oryndalǵaly tur. Kúıdiń avtory – Nurlan Bekenov. Sondaı-aq Jetisý kúı óneriniń belgili ókili Sybanquldyń «Túsiphannyń zary» degen kúıi shertiledi. Túsiphan Abaıdyń týysqany bolyp keledi, 25 jasynda ómirden erte ozǵan.
Sonymen qatar Qurmanǵazy, Dáýletkereı, Táttimbettiń kúıleri oryndalady.
Keshti aqyn Qýat Ejembek pen jas ónerpaz Aısáýle Aldanyshbaı júrgizedi. Kúılerdiń shyǵý tarıhy men erekshelikteri týraly sóz qozǵalady jáne óleńder oqylady.
