Elordada qusbegilerdiń halyqaralyq týrnıri ótti
ASTANA. QazAqparat - Elorda irgesindegi Sofıev aýylynda uıymdastyrylǵan qusbegilikten Kúntýǵan Toqtybaıuly atyndaǵy halyqaralyq týrnır búgin óz máresine jetti, dep habarlaıdy QazAqparat tilshisi.
Saıysqa elimizdiń túpkir-túpkirinen kelgen qusbegilermen qatar, Qytaı, Mońǵolııa jáne qyrǵyzstandyq qus baptaýshylar da qatysty.
Bul - bizdiń Qazaqstandaǵy jarysqa alǵash kelýimiz. Al, jalpy buǵan deıin qazaqstandyq qusbegilermen tájirıbe almasyp, birge jattyǵýlar ótkizgen bolatynbyz. Osy saıysqa 2 qus ákelip qostyq. Óıtkeni, Astana qalasy alys, qusty jetkizý ońaı sharýa emes. Bul saıystan keıin Qazaqstanda óńiraralyq oıyndar ótedi eken. Solarǵa da qatysýdy josparlap otyrmyz, - dedi Qyrǵyzstannyń Salbýryn ulttyq oıyny boıynsha bas bapker Nurlan Moldahanov.
Saıysqa qus qosqandardyń biri - Jetisý oblysynyń turǵyny Ábdikerim Túseı. Ol bul týrnırge búrkitin 1 aıdan asa baptaǵan.
Saıys joǵary deńgeıde ótti. Barlyq qatysýshylar qusyn jaqsy baptap kelgen. Biz Jetisý oblysynan 3 qus alyp keldik - eki búrkit, bir ıtelgi. Búgin kún raıy qolaısyz bolyp tur. Degenmen, babynda turǵan qustar jemtigin ustap, qolǵa oralyp jatyr, - deıdi Ábdikerim Túseı.
Týrnır qarshyǵa, ıtelgi jáne búrkit saıystaryn qamtydy. Uıymdastyrýshylardyń aıtýynsha, atalǵan jarys keler jyly elordada ótetin Dúnıejúzilik kóshpendiler oıyndaryna qatysatyndar úshin daıyndyq bolmaq.
Ózderińiz biletindeı, keler jyly bizde Dúnıejúzilik kóshpendiler oıyny ótedi. Ol buǵan deıin eki ret Qyrǵyzstanda, byltyr Túrkııada uıymdastyryldy. Astana ótetin Dúnıejúzilik kóshpendiler oıyndarynyń baǵdarlamasynda qusbegilik bar. Bul saıys sol oıyndar aldyndaǵy daıyndyqtyń biri dep aıtsaq bolady, - dep málim etti Astana qalalyq sport jáne deneshynyqtyrý basqarmasy basshysynyń orynbasary Erkeǵalı Karbozov.
Týrnır qorytyndysy boıynsha qarshyǵa saıysynda túrkistandyq Tólemyrza Pańnyń «Tuıǵyny» birinshi oryn aldy. Almaty oblysynan kelgen Aıan Seıtjannyń «Kókjendeti» ekinshi, atyraýlyq Arman Qoshqarov baptaǵan «Aqseńgir» úshinshi orynǵa ıe boldy.
Al ıteli saıysynda elordalyq Erasyl Serikbekulynyń «Qarakózi» úzdik atandy. Ekinshi jáne úshinshi oryndar qaraǵandylyq Tańat Ospanqulov baptaǵan qustardyń enshisinde.
Sonymen birge, búrkit saıysynda birinshi oryndy atyraýlyq Arman Qoshqarov jeńip aldy. Ekinshi oryn elordalyq Erasyl Serikbekulyna buıyrsa, aqmolalyq Erlan Kenjetaev tuǵyrda úshinshi kórindi.
