Elordada qurylysy bitpeı jatyp súrilgen nysannyń ornyna ne salynady
NUR-SULTAN. QazAqparat – Elordaǵy Syrtqy ister mınıstrligi ǵımaratynyń janyndaǵy nysan salynyp bitpeı jatyp, qaıta súrile bastady. «Astana» áleýmettik-kásipkerlik korporatsııasynyń baspasóz qyzmeti ǵımarattyń nege buzylatyny jáne ornyna ne salynatyny týraly málimet taratty, dep habarlaıdy QazAqparat tilshisi.
Astanalyq fotograf Vladıslav Vodnev óziniń Instagram paraqshasynda kópten beri qurylysy toqtap turǵan nysandy buzý jumystary bastalǵanyn jazdy jazdy.
«Saraıshyq kóshesinde kópten beri qurylysy toqtap turǵan nysandy súrý jumystary bastaldy. Dál osyndaı ádispen jaqynda «Terrıtorııa komforta» turǵyn úı kesheni qıratylǵan edi», - dep eske alady fotograf.
«Astana» áleýmettik-kásipkerlik korporatsııasynyń baspasóz qyzmeti osy oqıǵanyń mán-jaıyn túsindirdi.
«Astana» ÁKK «AQ birlesken ınvestıtsııalyq jobany júzege asyrý úshin «VYOL» JShS-ne jer telimin berdi. Qazir ǵımarattardy buzý jumystary júrip jatyr. Investor áýeli bul jerde Halyqaralyq uıymdar ortalyǵyn salady. Keıin kópfýnktsıonaldy keshen salýdy josparlap otyr. Aıta keteıik, joba tolyǵymen ınvestor esebinen qarjylandyrylady. Buzýǵa jáne qurylys qaldyqtaryn kádege jaratýǵa alynǵan ruqsattary bar», - dep túsindirdi kompanııanyń baspasóz qyzmeti.
2021 jylǵy 27 sáýirde qoǵam jobany iske asyrý sheńberinde «VYOL» JShS-ne jer ýchaskesin bergen eken. Al 2 tamyzda qurylysy aıaqtalmaǵan nysandy buzyp, qaldyqtaryn kádege jaratý týraly tıisti sheshimdi alǵan. 18 tamyzda «Vyol» JShS-ne Nur-Sultan qalasynyń qalalyq orta sapasy jáne baqylaý basqarmasy qurylys-montaj jumystarynyń bastaý kerektigi týraly habarlama jibergen.
«Qurylysty qarjylandyrýdy uıymdastyrý, jobalyq-smetalyq qujattamany ázirleý jáne ony belgilengen tártippen bekitý, merdigerlermen qurylys sharttaryn jasasý, obektini barlyq qajetti ınjenerlik-kommýnıkatsııalyq ınfraqurylymmen qamtamasyz etý, qurylysy aıaqtalǵan obektini paıdalanýǵa qabyldaýdy júzege asyrý, sondaı-aq obektini salý úshin qajetti ózge de jumystardyń oryndalýyn qamtamasyz etý mindettemelerin ınvestor derbes kóteredi. Qoǵam, óz kezeginde, jobany jedel iske asyrý úshin qajetti kez kelgen menshik nysanyndaǵy (uıymdyq-quqyqtyq nysandaǵy) memlekettik jáne kommýnaldyq uıymdarmen máselelerdi kelisý boıynsha jumystardy úılestirýge járdemdesedi», - dedi «Astana» ÁKK mamandary.
