Elordada qurylys taýarlary dúkeni qyzmetkerleriniń 97 paıyzy vaktsına aldy

NUR-SULTAN. QazAqparat – Elordadaǵy «Megastroı Astana Diy» qurylys taýarlary dúkeni qyzmetkerleriniń 97 paıyzy koronavırýsqa qarsy vaktsına saldyrdy. Búginde ujymdaǵy 260 qyzmetkerdiń 240-y ekpe alǵan. Osy oraıda indetpen kúreste vaktsına alýdyń mańyzdylyǵy týraly atalǵan ónerkásiptiń dırektory Jalǵas Aqjigitov QazAqparat tilshisine aıtyp berdi.

«Bizdiń qyzmetkerlerdiń 97 paıyzy vaktsına aldy. Keıbir qyzmetkerlerimizge medıtsınalyq turǵydan vaktsına alýǵa tyıym salynady. Barlyǵy 260 qyzmetker bolsa, sonyń 240-da vaktsına pasporty bar. Bizdiń ónerkásip elimizdiń 5 aýmaǵynda jumys isteıdi. Bárimizde vaktsına alýymyz kerek degen biraýyzdan sheshimge keldik. Men ózim 16 shilde kúni vaktsına pasportyn aldym. Sol kúni menimen birge bizdiń 215 qyzmetker de vaktsına pasportyna ıe boldy. Vaktsınany qalalyq №3 emhana dárigerlerinen aldyq. Ekpeni ujym bolyp alatyn bolǵandyqtan mamandardy ózimizge, osy oraıda ótinishimizdi birden oryndaǵan emhana dárigerlerine alǵysymyz sheksiz», - dedi astanalyq kásipker Jalǵas Aqjigitov.

Onyń aıtýynsha, ózi basqaryp otyrǵan ónerkásip Ashyq jobasynyń qatysýshysy.

«Qyzmetkerler de kelýshiler de ǵımaratqa Ashyq júıesi arqyly kiredi. Sol úshin de arnaıy buıryq shyǵardym. Odan bólek, jumysta maska taǵý, qoldy antıseptıkpen shaıý sekildi karantındik talaptar saqtalyp otyr. Búginde jaǵdaı rettelip keledi. Aıtar bolsaq, vaktsına alǵan qyzmetkerlerge qashyqtan jumys isteýdiń qajeti joq. Biz saýda salasynda eńbek etemiz sondyqtan qashyqtan jumys isteý tıimsiz. Denniń saýlyǵy men jumystyń toqtap qalmaýy jolynda vaktsına alǵan abzal», - deıdi ol.