Elordada qurylys qurylǵylaryn urlaýmen aınalysyp kelgen azamat ustaldy
NUR-SULTAN. QazAqparat – Elordada qurylys qurylǵylaryn urlaýmen aınalysyp kelgen azamat ustaldy. 47 jastaǵy er adamdy polıtsııa jedel-izdestirý sharalarynyń barysynda qolǵa túsirdi.
Tergeý kezinde kúdiktiniń elordadaǵy qurylysy júrip jatqan úılerdiń birine elektr júıesiniń sheberi bolyp jumysqa ornalasqany málim boldy. Ol qurylysta adamdardyń joqtyǵyn paıdalanyp, sol jerden tórt perforator, shegeni buraıtyn apparat, óndiristik mıkser, «Opel Vektra» kóliginiń qosalqy bólshekteri, taǵy basqa qural-saımandardy urlap áketken. Jalpy shyǵyn 600 myńǵa jýyq teńgeni qurap otyr. Bul týraly QazAqparat Nur-Sultan qalasy polıtsııa departamentiniń baspasóz qyzmetine silteme jasap habarlaıdy.
Kúdiktige qatysty QR QK 188-baby boıynsha («Urlyq») sot aldyndaǵy tergeý amaldary júrgizilýde. Er adamnyń buǵan deıin elorda aýmaǵynda osyǵan uqsas qylmystarǵa qatysy tekserilýde.
Nur-Sultan qalasynyń polıtsııa departamenti azamattardy qyraǵy bolyp, baǵaly zattaryn qaraýsyz qaldyrmaýǵa shaqyrady.
«Osy er adamnyń zańǵa qaıshy áreketterinen zardap shekken azamattardy Nur-Sultan qalasynyń Beıbitshilik, 19 kóshesi mekenjaıynda ornalasqan Polıtsııa departamentine habarlasyp, nemese 8 (7172) 71-60-69; 71-61-48, «102» nómirlerine telefon soǵýyn suraımyz», delingen polıtsııa taratqan aqparatta.
