Elordada Qurmanǵazy atyndaǵy VIII respýblıkalyq halyq aspaptarynda oryndaýshylar baıqaýy bastaldy
ASTANA. Mamyrdyń 24-i. QazAqparat /Marlan Jıembaı/ - Búgin elordadaǵy Prezıdenttik mádenıet ortalyǵynda Qurmanǵazy atyndaǵy VIII respýblıkalyq halyq aspaptarynda oryndaýshylar baıqaýynyń ashylý rásimi ótti.
1983 jyly uly kúıshige qurmet retinde bastalǵan óner báıgesiniń 2 jylda bir ret dástúrli túrde ótkizilip kele jatqandyǵyn atap ótken QR eńbek sińirgen qaıratkeri Aıtjan Toqtaǵannyń sózine qaraǵanda, bul dombyrada, sherterde, qobyzda, qylqobyzda, syrnaıda oryndaýshylardyń eń joǵary konkýrsy. «Ár el óziniń uly adamdarynyń atynda konkýrs ótkizedi. Máselen, Polshada Shopen, Reseıde Chaıkovskıı atyndaǵy konkýrs bar. Al elimizdegi Qurmanǵazy atyndaǵy baıqaý - eń basty konkýrsymyz», deıdi ol.
Onyń aıtýynsha, ótken jyldarǵa qaraǵanda bıyl qatysýshylardyń sany az bolǵanymen olardyń sapasy joǵary bolyp otyr. Sebebi buryndary kóbine kolledjderdiń, konservatorııalardyń stýdentteri qatyssa, aǵymdaǵy jyly qatysýǵa magıstranttar, aspıranttar, jumys isteıtin azamattar, orkestrlerdiń kontsertmeısteri nıet bildirgen.
Atalǵan konkýrs barysynda «Dombyra, sherter», «qobyz, qylqobyz», jáne «syrnaı» atalymdary boıynsha mýzykalyq bilimi bar, baıqaýdyń talap-sharttaryn tolyq meńgergen, elimizdiń túpkir-túpkirinen jınalǵan 16 men 32 jas aralyǵyndaǵy 50-den astam úmitker baq synaıdy. Saıyskerler konkýrs talaptaryna sáıkes ár kezeńde Qurmanǵazynyń 25 kúıin, sheteldik jáne qazaq kompozıtorlarynyń qazirgi zamanǵy jáne klassıkalyq týyndylaryn jatqa oryndaıdy. Baıqaýdyń eń negizgi sharty Qurmanǵazy konkýrsynda laýreat bolǵandar, ıaǵnı 1,2,3-shi oryn alǵandar qatyspaıdy.
Mamyrdyń 28-ine deıin jalǵasatyn konkýrstyń «dombyra, sherter» atalymy QR Prezıdenttik mádenıet ortalyǵynda, «qobyz, qylqobyz» atalymy Qazaq ulttyq óner ýnıversıtetiniń organ zalynda, al «syrnaı» atalymy atalǵan ýnıversıtettiń kontsert zalynda ótedi. Birinshi atalymǵa QR eńbek sińirgen qaıratkeri, professor Aıtjan Toqtaǵan, ekinshige QR halyq ártisi professor Ǵalııa Moldakárimova, úshinshige Qazaq ulttyq óner ýnıversıtetiniń dotsenti Alekseı Efremenko tóraǵalyq etken qazylar alqasy tórelik jasaıdy.
Mádenı sharany QR Mádenıet mınıstrligi men «Qazaq áýenderi» AQ-y uıymdastyryp otyr.
