Elordada qurylysy uzaqqa sozylǵan saýda ortalyǵy satylymǵa qoıyldy
ASTANA. KAZINFORM — Elordada Respýblıka dańǵyly men Imanov kóshesiniń qıylysynda saýda jáne oıyn-saýyq ortalyǵynyń qurylysy birneshe jyldan beri aıaqtalmaı keledi.
— «Sıtı palas» kópfýnktsıonaldy saýda jáne oıyn-saýyq ortalyǵynyń aıaqtalmaǵan qurylys nysany satylady. Qurylys-montaj jumystary júrip jatqan joq, — delingen habarlama jarııalandy krisha.kz saıtynda.
Osylaısha saýda jáne oıyn-saýyq ortalyǵy 13 500 000 000 teńgege baǵalanyp otyr. Degenmen jyljymaıtyn múlik naryǵynda qoldanystaǵy baǵaǵa baılanysty quny ózgerýi múmkin ekendigi aıtylǵan.
Sondaı-aq, habarlandyrýda nysan qurylysynyń qoldanysqa qanshalyqty daıyn ekendigi paıyzben kórsetilgen. Onyń ishinde irgetasy — 100%, qabyrǵalary — 100%, shatyry — 20-30%, edeni -100%, ishki bólikteri — 90%, syrtqy árleýi — 85%, ishki ınjenerlik jelileri — 20%, abattandyrý — 40%-ǵa daıyn.
Eske sala ketsek, 2023 qyrkúıekte elorda ákimdiginiń baspasóz qyzmeti banktik ınvestıtsııalar boıynsha aýyrtpalyqtarǵa baılanysty (Jusan Bank) atalǵan saýda, oıyn-saýyq ortalyǵy qurylysynyń toqtatylǵanyn habarlaǵan edi.
Keıinnen Astana ákimi Jeńis Qasymbek «saqaldy qurylysqa» aınalǵan Sıtı palas kesheniniń ıesin tabýǵa ýáde berdi.
Byltyr «Sıtı Palas» saýda-oıyn-saýyq ortalyǵynyń menshik ıesi aýysqanyn jazdyq.