Elordada kúres túrlerinen Álem chempıonatynyń alǵashqy jeńimpazdary anyqtaldy
NUR-SULTAN. QazAqparat – Elorda tórinde kúres túrlerinen ótip jatqan Álem chempıonatynyń ekinshi kúni grek-rım kúresinen 4 salmaq boıynsha jeńimpazdar anyqtaldy, dep habarlaıdy QazAqparat tilshisi.
Atap aıtar bolsaq, 55, 63, 72 jáne 82 kelide baq synaǵan balýandar ózara myqtyny anyqtady. Olımpıada oıyndaryna joldama sarapqa salynyp jatqan astanadaǵy álem birinshiliginiń alǵashqy altyn medali Grýzııa balýanyna buıyrdy. Ol fınalda qazaqstandyq sportshydan aılasyn asyryp, abyroıy tasydy.
62 keli salmaqtyń bas júldesi jartylaı fınalda qazaqstandyq Almat Kebispaevtan aılasyn asyrǵan japonııa balýany Shınobý Otaǵa buıyrdy.
72 keli salmaqta reseılik balýan teńdessiz ekenin kórsetse, 82 keli salmaqtyń kóshin taǵy bir Grýzııa balýany qanjyǵasyna baılady. Osylaısha, grýzınder 2 altyn medalmen birden jalpy esepte kósh bastady.
Kúres túrlerinen Álem chempıonatynyń alǵashqy jeńimpazdary men júldegerleri:
55 keli:
1. Nýgzarı Tsýrtsýmııa (Grýzııa)
2. Qorlan Jaqansha (Qazaqstan)
3. Eldanız Azızlı (Ázerbaıjan), Shota Ogava (Japonııa)
63 keli:
1. Shınobý Ota (Japonııa)
2. Stepan Marıanıan (Reseı)
3. Almat Kebispaev (Qazaqstan), Slavık Galstıan (Armenııa)
72 keli:
1. Abýıazıd Mantsıgov (Reseı)
2. Aram Vardanıan (Ózbekstan)
3. Balınt Korpashı (Vengrııa), Aık Mnatsakanıan (Bolgarııa)
82 keli :
1. Lasha Gobadze (Grýzııa)
2. Rafıg Gýseınov (Ázerbaıjan)
3. Saıd Abdýalı (Iran), Tsıan Haıtao (Qytaı).
Aıta keteıik, osyǵan deıin Qorlan Jaqansha kúmis medal, al Almat Kebispaev qola medal jeńip alǵanyn jazǵan bolatynbyz. Jaqansha jeńip alǵan kúmis medal onyń Álem chempıonatyndaǵy alǵashqy júldesi bolsa, Kebispaevtiń qolasy Álem chempıonatyndaǵy úshinshi qolasy. Ol osyǵan deıin 2010 jyly Máskeýde, 2015 jyly Las-Vegasta ótken álem birinshiliginde qola medal enshilegen bolatyn. Sondaı-aq, Almat 2011 jylǵy álem birinshiliginiń kúmis júldegeri.
