Elordada Kýprın úıin qalalyq mýzeı etip qaıta ashý máselesi kóterildi

ASTANA. QazAqparat – HH ǵasyrdyń basynda negizi qalanǵan elordadaǵy tarıhı jádigerlerdiń biri – kópes Kýprın úıi. Astana turǵyny atalǵan úıdi qalalyq mýzeı retinde qaıta jańǵyrtýdy usyndy, dep habarlaıdy QazAqparat tilshisi.

«Elordada týrızmdi damytýda kedergiler bar. Mysaly, EKSPO-daǵy mýzeıdi alsaq, aptanyń úsh kúni ǵana jumys isteıdi. Mýzeı jumys istemeıtin kúnderi kelgen týrıster sonda qaıda barady? Ulttyq mýzeıde balalarǵa arnalǵan bólme ashylypty, demalys kúnderi jıenderimdi aparaıyn desem, biz «seısenbi, juma kúnderi jumys isteımiz» deıdi», - dedi Astana týrızm qaýymdastyǵynyń ókili Tatıana Vernıtskaıa ákim orynbasarymen kezdesý barysynda.

Sondaı-aq, ol qalalyq mýzeıdi qaıta jańǵyrtý ıdeıasyn kóterdi.

«Bizde qalalyq mýzeı joq. Buryn kópes Kýprınniń úıi mýzeı boldy. Ol HH ǵasyrdyń basynda ashylǵan. Ol búginde jabyq tur. Demek qala tarıhynan habar beretin, búgingi Astananyń qaıdan bastalatynyn baıandaıtyn mýzeı joq. Bizge salalyq mýzeıler de kerek. Elordada tarıhy bar birneshe ónerkásip bar», - deıdi ol.

Usynysty tyńdaǵan qala ákiminiń orynbasary Erlan Bekmyrzaev ıdeıany júzege asyrý jaǵy qaralatynyna ýáde berdi.

Aıta ketsek, elordada qala orynbasarynyń, qalalyq Atameken ulttyq kásipkerler palatasy basshyshylyǵy jáne túrli bıznes ókilderiniń qatysýymen jıyn ótti.

Atalǵan sharaǵa ortaǵa salynǵan taqyryptyń biri qalalyq týrızmdi damytý.

Foto: wikipedia.org