Elordada kúnine 450 adam dezınfektsııa jumysyn júrgizýde

NUR-SULTAN. QazAqparat – Koronavırýs ınfektsııasynyń keń aýqymda taralýyna jol bermeý maqsatynda elordada kún saıyn dezınfektsııalyq jumystar júrgizilip jatyr. Ásirese áleýmettik nysandarǵa, bazarlar men sýpermarketterge, jaıaý júrginshiler joly men balalar alańyna, podezderge basa mán berilýde, dep habarlaıdy QazAqparat tilshisi.

Qazirgi tańda astanada kúnine 450 adam dezınfektsııalyq jumystardy júrgizip, qaýipsizdik sharalaryn qabyldap jatyr. Qalalyq qyzmetpen birge iske Qarýly kúshterdiń bıologııalyq qorǵaý bólimsheleri de tartylǵan.

«Tań atpastan shyǵyp, aýlaishilik aýmaqtardy, podezder men balalar alańyn tazartamyz. Ásirese adam kóp jınalatyn aýmaqqa basa mańyz beriledi. Preparat tıimdi. Halyqty ınfektsııadan barynsha saqtanýǵa shaqyramyz. Aldyn alý jumystarynyń bárin ustaný kerek. Dezınfektordyń jumysy kúrdeli. Bári de arnaıy kıim kıip, aýyr apparatýralardy kóterip júredi. Ol apparatýrany qaıta-qaıta toltyryp turý kerek. Bizdiń eń basty mindetimiz – aýmaqty barynsha tazalaý», - deıdi dezınfektor Qýanysh Tankeev.

Aıta ketsek 30 naýryzdan bastap qalada sanıtarlyq tazalaý men dezınfektsııalaý jumystary kúsheıtiledi. Bankterdiń ishinde de atalmysh jumys keńinen júrgizilmek. Osy sebepti dezınfektorlar bank qyzmetkerleri men klıentterine maska men qolǵap kııýdi eskertedi.

Al bankter óz tarapynan klıentterge barynsha qashyqtaǵy onlaın-bankıng arqyly jumys júrgizý mańyzdy ekenin eskertýde.