Elordada kúnine 102 pýltyna qansha qońyraý kelip túsedi
NUR-SULTAN. QazAqparat – Nur-Sultan qalalyq Polıtsııa departamenti Jergilikti polıtsııa basqarmasynyń basshysy Ǵusman Jakın kúnine elordalyqtardan qansha qońyraý kelip túsetinin aıtyp berdi, dep habarlaıdy QazAqparat tilshisi.
«Patrýl jasaqtary men ýchaskelik ınspektorlar kúnine 500 qońyraý boıynsha shara qabyldap, jumys júrgizedi. Buǵan onyń ústine jedel tergeý toptarynyń jumysyn qosa eseptegende tipti kóp. Tek kóshedegi jasaqtar ǵana 102 qyzmetine túsetin 500 qońyraý boıynsha shaqyrylǵan jerge barady», - dedi Gusman Jakın departamentte ótken baspasóz máslıhatynda.
Basqarma basshysy halyqtyń túsken qońyraýlardy qabyldaý jáne ol boıynsha shara qabyldaý qalaı júrgiziletinin de túsindirdi.
«Bizdiń qyzmetkerler ár shaqyrý boıynsha oryndarǵa barady. Jedel kezekshiler bul rette arnaıy kartochkany toltyratynyn aıta ketý kerek», - dedi ol.
Ǵusman Jakınniń aıtýyna qaraǵanda, keıbir jaǵdaıda turǵyndardyń ózi bolǵan oqıǵaǵa qatysty túsindirme bergisi kelmeıdi.
«Keıde turǵyndar qyzmetkerlerimizdi shaqyryp alyp, kelgennen keıin jaǵdaıdy túsindirýden bas tartyp jatady. Tipti esikti ashpaı qoıatyndary da bar. Kóktem men jaz aılarynda úıdiń jelkóz terezesi ashyq turady. Mine, sol sebepti tynyshtyqtyń buzylýyna baılanysty qońyraýlar jıi túsedi. Bul úshin arnaıy ákimshilik jaýapkershilik baryn eskerý kerek. Kóp jaǵdaıda bizdiń qyzmetkerlerge ondaı qońyraýlar túnde túsedi. Al shý shyqqan úı ıeleri esigin ashpaı qoıady. Sol sebepti, biz tań atqan kezde PIK qyzmetkerlerimen birge qaıta áli shý shyqqan páter boıynsha jumys júrgizemiz. Biraq, bul rette bizdiń qyzmetkerler qulaq aspaı qoıatyn jaǵdaılar joq ekenin atap ótý kerek», - dedi ol.
Ǵusman Jakın sonymen birge shaqyrylǵannan keıin tártip saqshylary qansha ýaqyttyń ishinde kelýi kerektigin de aıtyp ótti.
«Bizdiń qalanyń ereksheligine baılanysty biz qyzmetkerlerdiń aldyna 7 mınýttyń ishinde barýdy mindettegenbiz. Ortasha eseppen polıtsııa qyzmetkerleri 15 mınýttyń ishinde keledi. Biraq, bári de táýliktiń ýaqytyna jáne avtokóliktiń trafıgine baılanysty», - dedi ol.
Aıan Bekenuly
