Elordada quny 2 mlrd teńgeden asatyn ınjenerlik jeliler memleketke qaıtaryldy
ASTANA. KAZINFORM – Astanada prokýratýranyń qadaǵalaý sharalary nátıjesinde quny 2 mlrd teńgeden asatyn ınjenerlik jeliler memleket menshigine qaıtaryldy. Bul týraly qalalyq kommýnıkatsııalar qyzmetinde ótken brıfıngte qala prokýrorynyń kómekshisi Azamat Qazbekov málimdedi.
Onyń aıtýynsha, prokýratýra azamattar men memlekettiń múliktik quqyqtaryn qorǵaý, sondaı-aq zańsyz shyǵarylǵan aktıvterdi qaıtarý baǵytyndaǵy jumysty turaqty baqylaýda ustap otyr.
Sondaı-aq paıdalanylmaı jatqan nemese zań talaptaryn buza otyryp berilgen jer ýchaskelerin memleket menshigine qaıtarý jumystary júrgizilip jatyr.
– Ótken jyly shamamen 300 gektar ıgerilmegen jer jáne 3 myń gektardan astam paıdalanylmaı jatqan aýyl sharýashylyǵy jeri anyqtaldy. Prokýrorlyq den qoıý aktileri negizinde olardy memleketke qaıtarý sharalary qabyldandy. Sonymen qatar jer ýchaskelerin aýktsıonsyz zańsyz berý faktileri toqtatyldy, – dedi Azamat Qazbekov.
Qadaǵalaý barysynda qurylys salýshylardyń ınjenerlik jelilerdi kommýnaldyq menshikke ótkizbeýine baılanysty zań buzýshylyqtar da anyqtalǵan.
– Nátıjesinde 54 turǵyn úı kesheniniń jalpy quny 2 mlrd teńgeden asatyn ınjenerlik jelileri memleket menshigine qaıtaryldy. Qazir taǵy 10 mlrd teńge kólemindegi múlikti qaıtarý jumystary jalǵasyp jatyr, – dedi ol.
Aıta keteıik, prokýratýra QAJ júıesindegi zańdylyqty qadaǵalaý jumystaryn kúsheıtkenin habarlaǵan edik.
