Elordada kún raıynyń qolaısyzdyǵynan ushaqtar keshigip jatyr

ASTANA. KAZINFORM – Elordada ushý-qoný jolaǵy aýa raıynyń qolaısyzdyǵyna baılanysty ýaqytsha jabyldy.

- Búgin saǵat 8:33-ten 10:33-ke deıin Astana áýejaıynyń ushý-qoný jolaǵy qolaısyz aýa raıy jáne tehnıkalyq qyzmet kórsetýge baılanysty ýaqytsha jabyldy. Ushý-qoný jolaǵyn qardan tazalap, qaýipsizdikti qamtamasyz etý úshin áýejaı aýmaǵynda 10 arnaıy tehnıka jumys istep jatyr, - delingen habarlamada. 

Aqparatta aıtylǵandaı, qazir ushatyn 70 reıstiń 6-y keshiktirilip, qonatyn 68 reıstiń 14-i de keshiktirildi. Onyń sebebi aýa raıynyń qolaısyzdyǵy men aerodromǵa tehnıkalyq qyzmet kórsetýge baılanysty.

- Jolaýshylar reısterdiń jaı-kúıi men kestedegi ózgerister týraly aqparatty áýejaıdyń resmı saıty (www.nn-airport.kz) arqyly nemese táýlik boıy jumys isteıtin baılanys ortalyǵynan: 8 (7172) 702-999 bile alady, - dep habarlaıdy elorda áýejaıy. 

Qazgıdromettiń eskertýinshe, búgin Qazaqstannyń barlyq aımaǵynda jel kúsheıip, tuman túsedi, kóktaıǵaq bolady.