Elordada «Kún Álemi» atty alǵashqy saıabaqtar festıvali ótedi
ASTANA. QazAqparat - 5 shildede saǵat 10.00 qalalyq saıabaqtarda («Stýdentter», «Jeruıyq» saıabaqtary, Astanalyq park, Ǵashyqtar parki) Qala kúni aıasyndaǵy merekelik sharalar bastalady.
Bul týraly astana.kz saıtyna Astana qalasynyń 16 jyldyǵyna arnalǵan merekelik sharalardy daıyndaý jáne ótkizý jónindegi uıymdastyrý komıtetiniń medıa-shtabynan habarlady. «Jeruıyq» saıabaǵynda - «Etno shýaq» baǵdarlamasy. Elorda turǵyndary men qonaqtary úshin etnıkalyq mýzykalyq aspaptarda oınaý boıynsha aqysyz sheberlik synyptary, balalar men eresekterge arnalǵan qyzyqty oıyndar, sondaı-aq «Býgarabý» baraban shoýy ótkiziledi.
«Stýdenttik» saıabaǵynda - «Jadymnyń bulttary» baǵdarlamasy. Ótken ǵasyrdyń orta tusyndaǵy klassıkalyq demalys saıabaǵynyń atmosferasy ornap, bı óneri boıynsha tegin sheberlik synyptary men qolóner jármeńkesi uıymdastyrylady. Al keshke elge tanymal «Dos-Muqasan» ansambli óner kórsetedi.
«Astanalyq» saıabaǵynda - «Jańa kókjıekter» baǵdarlamasy. Jańartylǵan saıabaqtyń ishinde shyǵarmashylyq ınstallıatsııalar, qazirgi sýretshilerdiń kórmeleri, aınalar labırınti jáne «JCS» tobynyń qatysýymen mýzykalyq baǵdarlama kópshilik nazaryna usynylady.
Al Ǵashyqtar saıabaǵynda - «Mahabbattyń kúni» baǵdarlamasy. Munda kóshe teatrlary ártisteriniń qoıylymdary, fleshmob, qalyńdyqtar sherýi jáne jarqyraǵan máskeýlik Fireshow kórsetiledi.
