Elordada qumar oıynyn uıymdastyrýshy sottaldy
NUR-SULTAN. QazAqparat - Sottalýshy qumar oıyn bıznesin jeke kásipker retinde tirkelý arqyly júzege asyryp kelgen, dep habarlaıdy QazAqparat qalalyq Prokýratýraǵa silteme jasap.
Qalalyq prokýratýranyń deregine súıensek, sońǵy úsh jylda elordaǵa QR Bas prokýratýra arqyly shetelden 11 azamat ekstradıtsııalandy (Reseı, BAÁ, Ózbekstan, Ázerbaıjan, Ýkraına, Armenııa) onyń 10-na úkimi shyqty jáne bireýiniń isi sotta qaralýda.
«Ústimizdegi jyldyń 15 aqpanynda Nur-Sultan qalasy №2 Saryarqa aýdandyq soty iri kólemdegi kirisi bar zańsyz qumar oıyn bıznesin uıymdastyrǵan (QK 307-babyniń 3-bólimi 2-tarmaǵyna sáıkes) B.E. Atabaev 4 jylǵa bas bostandyǵynan aıyrdy», - delingen qalalyq prokýratýranyń habarlamasynda.
Haralamada aıtylǵandaı ol Qazaqstanda kazıno jumysyn júrgizýge tyıym salynǵanyna qaramastan (Almaty oblysy Qapshaǵaı sý qoımasynyń jaǵalaýy men Aqmola oblysy Şýchınsk aýdanyn eseptemegende) 2016-2017 jyldary K.Parfenov, E.Maltsev jáne taǵy basqa azamattarmen tabys tabý maqsatynda elordada 47 oıyn termınalyn ornatyp, qumar oıynyn kásip etken.
«Óz kásibin zańdy túrde júzege asyrý úshin qalalyq salyq basqarmasynda «Kýlıkova I.A» ataýymen tirkelgen jeke kásipkerlik arqyly jumys istegen. Mamandar jasaǵan qorytyndyǵa sáıkes, barlyq termınaldarǵa onlaın-kazıno oıyndary ornatylǵan. Oıyn avtomattary arqyly qabyldanǵan jáne berilgen qarajattyń jalpy somasy 17,5 mln teńgeni quraıdy», - dep habarlaıdy prokýratýra.
Qylmystyq organdardyń quryǵynan qashyp júrgen B.E. Atambaevqa halyqaralyq izdeý jarııalandy, araǵa 3 aı ýaqyt salyp ol Ózbekstan aýmaǵynda ustalyp, Qazaqstanǵa ekstradıtsııalandy. Sonymen qatar onyń sybaılastary da buryn qalalyq sottyń úkimimen ártúrli merzimge bas bostandyqtarynan aırylǵan.
