Elordada «Kúltegin» anımatsııalyq fılmin 5 myńǵa jýyq bala tegin tamashalady
NUR-SULTAN. QazAqparat - QR Mádenıet jáne sport mınıstrligi «Qazaqkontsert» memlekettik kontserttik uıymy «Kúltegin» mýltfılminiń qaıyrymdylyq kórsetilimin uıymdastyrdy, dep habarlaıdy QazAqparat tilshisi.
Bul qaıyrymdylyq bastama Naýryz merekesinen bastaý aldy. «Kúltegin» mýltfılmniń 2 seansyna 5 000-ǵa jýyq bala, onyń ishinde kópbalaly jáne áleýmettik turǵydan az qamtylǵan otbasylardan shyqqan balalar, jetimder úıiniń tárbıelenýshileri, múgedek balalar da qatysty.
«Bul qaıyrymdylyq is-shara otandyq mýltfılmder arqyly jas kórermenniń el tarıhyna degen qyzyǵýshylyǵyn arttyrady. Otandyq anımatsııalyq týyndylardy kórsetýdegi maqsat - dańqty batyrlardyń erligin, qazaq halqynyń mádenıetin anımatsııa arqyly tanytý, sondaı-aq jas urpaqty otansúıgishtikke baýlý. Aldaǵy ýaqytta «Qazaqkontsert» pen «Qazaqfılm» uıymdarynyń birlesken bastamasy óz jalǵasyn taýyp, «Qazaqstan» OKZ kınozalynda mýltfılmder jáne qazaq kıno óneriniń basqa da ozyq týyndylary jas búldirshinderge tegin kórsetilmek», - dep habarlaıdy mınıstrlikten.
Túrik qaǵanatynyń dańqty áskerı qolbasshysy Kúlteginniń erligi týraly baıandaıtyn bul mýltfılmdi QR Mádenıet jáne sport mınıstrliginiń tapsyrysy boıynsha Sh.Aımanov atyndaǵy «Qazaqfılm» AQ túsirgen. Qazaq jáne orys tilderinde kórsetilgen «Kúltegin» mýltfılmi kishkentaı búldirshinderdiń kóńilinen shyǵyp otyr. Ata-analar da ıgi is-sharanyń uıymdastyrýshylaryna óz alǵystaryn jetkizdi.
«Aıala» qaıyrymdylyq qory QR Mádenıet jáne sport mınıstrligi uıymdastyratyn kóptegen mádenı is-sharalarǵa jıi qatysady. Búgin «Kúltegin» mýltfılminiń qaıyrymdylyq kórsetilimin Nur-Sultan qalasynyń «Balalar úıi» MKM tárbıelenýshileri tamashalady. Buǵan deıin kórsetilgen «Muzbalaq» mýltfılmine arnaıy mektep-ınternattardyń 200-ge jýyq oqýshysy qatysty. Osyndaı bastamalardy biz árdaıym qoldaýǵa daıynbyz. Ata-ana qamqorlyǵynsyz qalǵan búldirshinderge kóńil bólip, osyndaı qyzyqty ári tanymdyq týyndyny kórýge shaqyrǵan uıymdastyrýshylarǵa alǵysymyz sheksiz», - deıdi «Aıala» qaıyrymdylyq qorynyń Nur-Sultan qalasyndaǵy ókili Saltanat Áskerbekqyzy.
Eske salsaq, 22 jáne 24 naýryz kúnderi elordadaǵy QAZAQSTAN ortalyq kontsert zalynda «Muzbalaq» anımatsııalyq fılmin 5 600 búldirshin tamashalaǵan bolatyn.
