Elordada «Kúltegin» anımatsııalyq fılmi tegin kórsetiledi
NUR-SULTAN. QazAqparat - Elordada «Kúltegin» anımatsııalyq fılmi tegin kórsetiledi, dep habarlaıdy QazAqparat Elorda Infoǵa silteme jasap
«7 sáýir kúni QAZAQSTAN ortalyq kontsert zalynda «Kúltegin» mýltfılminiń qaıyrymdylyq kórsetilimi ótedi. Kishkentaı kórermenderdi mýltfılmniń eki seansy kútýde. Anımatsııa, grafıka jaǵynan sheteldik mýltfılmderden kem túspeıtin týyndy saǵat 15.00-de qazaq tilinde, al 17.00-de oryssha kórsetiledi. Kópbalaly jáne áleýmettik turǵydan az qamtylǵan otbasylardan shyqqan balalar, jetimder úıiniń tárbıelenýshileri, múgedek balalar úshin kirý tegin», - delingen QAZAQSTAN memlekettik kontsert uıymynyń Feısbýk paraqshasynda.
QR Mádenıet jáne sport mınıstrliginiń tapsyrysy boıynsha Sh.Aımanov atyndaǵy «Qazaqfılm» AQ túsirgen týyndy Túrik qaǵanatynyń dańqty áskerı qolbasshysy Kúlteginniń erligi týraly baıandaıdy.
Aıta ketsek, atalǵan mádenı mekeme buǵan deıinde elordalyq búldirshinderge tartý jasaǵan bolatyn. Naýryz merekesi qarsańynda «Muzbalaq» mýltfılmi qazaq jáne orys tilderinde kórsetilip, oǵan 5 600 kishkentaı kórermen qatysty.
