Elordada qulaqtandyrý dabyl júıesi iske qosylady
NUR-SULTAN. QazAqparat – Búgin saǵat 16.00-de Nur-Sultan qalasynyń qulaqtandyrý júıeleriniń dabyly iske qosylady, dep habarlaıdy QazAqparat tilshisi.
«1 naýryzda saǵat 16.00-de Nur-Sultan qalasynyń qulaqtandyrý júıelerin tele-radıo arnalardy qamtı otyryp, elektrodabyldaryn qosý arqyly tekserý júrgiziledi», - dep jazylǵan Nur-Sultan qalasy tótenshe jaǵdaılar departamentiniń baspasóz qyzmeti taratqan aqparatta.
Departament mamandary atalǵan dabyldy estigen kezde baıbalam salýdyń qajeti joq ekenin eskertedi.
«Esterińizge salaıyq, tótenshe jaǵdaı oryn alǵan kezde halyqtyń nazaryn aýdarý úshin elektrlik nemese basqa da dabyl quraldary qosylady. Onyń maǵynasy «Barshańyzdyń nazaryna!» degendi bildiredi. Bul dabyldy estigen kezde turǵyndar ne bolyp jatqanyn bilý úshin jáne qalaı áreket etý qajettigi týraly nusqaýlar men aqparat alý úshin mindetti túrde teledıdar, radıo sııaqty qoljetimdi aqparat qabyldaý quraldaryn qosýy kerek.
Qurmetti qala turǵyndary men qonaqtary, Nur-Sultan qalasy tótenshe jaǵdaılar departamenti qala turǵyndaryn sabyr saqtaýǵa, úreılenbeýge shaqyrady», - delingen habarlandyrýda.
