Elordada quqyq buzýdyń 15 túri avtomatty túrde anyqtalady
ASTANA. KAZINFORM — Elordada quqyq buzýshylyqtardyń 15 túri avtomatty túrde anyqtalady. Bul týraly Úkimet otyrysynda Astana ákimi Jeńis Qasymbek aıtty.
— Elordada 471 myń kólik quraly tirkelgen. Jyl saıyn olardyń sany 25–30 myńǵa artyp keledi. Sonymen qatar, joǵary maıatnıktik mıgratsııa saqtalyp otyr. Kún saıyn qalaǵa 150 myńǵa jýyq kólik kirip-shyǵady. Kóshe-jol jelisine artyp kele jatqan júktemeni eskere otyryp, Kólik júıesin damytýdyń keshendi baǵdarlamasy júzege asyrylyp jatyr. Biryńǵaı operator bolyp Jol qozǵalysyn basqarý ortalyǵy aıqyndaldy. Ol turaqtar keńistigin, kólik qozǵalysyn, baǵdarshamdardyń jumysyn, kólikterdi evakýatsııalaýdy jáne kóliktik josparlaýdy úılestiredi. Kólik qozǵalysy aǵyndary ITS ıntellektýaldy kólik júıesi arqyly basqarylyp, baǵdarshamdardyń 80 paıyzy basqarý júıesine kóshirildi, — dedi qala basshysy.
Onyń aıtýynsha, Presight kompanııasymen birlesip beınebaqylaý ınfraqurylymy jańartyldy. Smart City jobasy aıasynda bıyl jol qozǵalysy erejelerin buzýshylyqtardy tirkeıtin 1 200-den astam keshen jumys istep tur. 60 myńnan astam beınekamera qalanyń Sıtýatsııalyq ortalyǵyna ıntegratsııalanǵan. Avtomatty túrde anyqtalatyn quqyq buzýshylyqtar sany 4-ten 15-ke deıin artty. Sondaı-aq, jasandy ıntellekt negizinde beıne-analıtıkanyń 35 túri engizildi. Quqyq buzýshylyqtyń jańa túrlerin esepke alý aǵymdyǵy jylǵy sáýir aıynda bastaldy.
— Kóshe-jol jelisiniń ótkizý qabiletin arttyrý boıynsha sharalar qabyldanyp jatyr. Baǵdarshamdardyń jumys rejımderi túzetildi, kólik qozǵalysy qarqyndy ýchaskelerde solǵa burylýǵa shekteý qoıylyp, balamaly keri burylý oryndary uıymdastyryldy. Bul óz kezeginde kóshelerdiń ótkizý qabiletine oń áserin tıgizdi. Jol belgilerin ornatý jumystary jalǵasyp jatyr. Jol jóndeý jumystarynyń jáne qoldanylatyn materıaldardyń, onyń ishinde asfaltbeton jabynynyń sapasyn qamtamasyz etý tásilderi qaıta qaraldy. Jasyl jelekter men jarnamalyq konstrýktsııalardy, kóshe jıhazdaryn jáne abattandyrýdyń basqa da elementterin ornalastyrý kezinde, ásirese mektepter, balabaqshalar men aýrýhanalardyń mańynda kóriný aımaqtarynyń shektelýine paıda bolýyna jol berilmeıdi, — dedi Jeńis Qasymbek.
Aıta keteıik, Tarlan Astana jeńil relsti kólik júıesi avtobýs marshrýttarymen jáne kóliktik-logıstıkalyq toraptarmen ıntegratsııalanady.
