Elordada QR Tuńǵysh Prezıdenti kúnine oraı mádenı sharalar uıymdastyrylady

ASTANA. QazAqparat - QR Tuńǵysh Prezıdenti kúnin atap ótý aıasynda elorda turǵyndary men qonaqtary úshin keń aýqymdy sharalar uıymdastyrylady, dep habarlaıdy astana.kz.

Úsh kún boıy «Astana Opera» memlekettik opera jáne balet teatrynda birneshe kontsert ótedi. Atap aıtqanda, «Operaǵa súıispenshilikpen», «Vokaldyq dıvertısment», Motsarttyń «Rekvıemi». 25 qarasha - 3 jeltoqsan aralyǵynda «Aljır» murajaıynda «Túrki áleminiń biregeı tulǵasy» taqyrybynda beınepanoramalyq kórme ótedi. Klassıkalyq mýzykany unatatandar 29 qarashada Qazaq UÓÝ organ zalynda ótetin Astana qalasy ákimdiginiń Memlekettik fılarmonııasy sımfonııalyq orkestriniń kontsertin tamashalaıdy.

1 jeltoqsanda «Qulansaz» folklorlyq etnografııalyq ansambliniń qatysýymen «Qazaǵymnyń qanaty» kontserti uıymdastyrylady. Al «Astana Opera» teatrynyń aldyndaǵy alańda QR Tuńǵysh Prezıdenti kúnine oraı elimizdiń Bas shyrshasyn jaǵylady. Sonymen qatar, Astanada shyǵarmashylyq ujymdardyń qatysýymen kontsertter, etnıkalyq mýzyka festıvaldary ótedi.