Elordada QR Prezıdenti júldesi úshin qazaq kúresinen «Qazaqstan Barysy» mereıtoılyq týrnıri ótedi
ASTANA. QazAqparat - Búgin, 4 shilde kúni elordadaǵy «Saryarqa» velotreginde Ult kóshbasshysy - Qazaqstan Respýblıkasynyń Prezıdenti N.Á.Nazarbaevtyń júldesi úshin qazaq kúresinen «Qazaqstan Barysy» V respýblıkalyq týrnıriniń fınaldyq kezeńi ótedi.
Bıyl besinshi ret uıymdastyrylatyn «Qazaqstan Barysy» týrnırine elimizdiń ár aımaǵynan iriktelgen 32 balýan men byltyrǵy jylǵy jarystyń jeńimpazy Muhıt Tursynov joldama alyp otyr. «Qazaqstan Barysy» V respýblıkalyq týrnıriniń júlde qory 225 000 AQSh dollaryn quraıdy. Onyń ishinde 35 myń AQSh dollary sportshylardyń jattyqtyrýshylaryna taǵaıyndalǵan. Júlde qory tómendegideı: 1-oryn - 150 myń AQSh dollary; 2-oryn - 30 myń AQSh dollary; 3-oryn - 10 myń AQSh dollary. Dodanyń bas demeýshisi «Samuryq-Qazyna» Ulttyq ál-aýqat qory» AQ bolyp tabylady.
