Elordada kottedj tonaýdy kásip etkender qolǵa tústi
NUR-SULTAN. QazAqparat - Elordalyq polıtsııa qyzmetkerleri jedel-izdestirý is-sharalary barysynda kottedjderge urlyqqa túsýdi kásip etken eki azamatty qolǵa túsirdi, dep habarlaıdy QazAqparat elordalyq Polıtsııa departamentiniń baspasóz qyzmetine silteme jasap.
Ustalǵandar Túrkistan men Soltústik Qazaqstan oblysynyń týmalary bolyp shyqty. Olar buryn da isti bolǵan.
Tergep-tekserý barysynda kúdiktilerdiń negizinen qala shetindegi kottedjderge urlyqqa túsip júrgenderi anyqtaldy. Olar kúndizgi ýaqytta-aq úılerdiń plastıkalyq terezelerin buzyp kirip, ishtegi aqsha, zergerlik buymdar men qymbat tondardy qoldy etip kelgenderi belgili boldy. Qazirgi tańda ustalǵandardyń osy tektes 4 urlyqqa qatysy bar ekeni anyqtaldy.
Olar ýaqytsha ustaý ızolıatoryna qamaýǵa alynyp, elorda aýmaǵynda buryn jasalǵan osyǵan uqsas qylmystarǵa qatysy bar-joǵy tekserilýde.
«Atalǵan tulǵalardyń quqyqqa qaıshy áreketterinen zardap shekken azamattarǵa Beıbitshilik 19 mekenjaıy boıynsha Nur-Sultan qalasy Polıtsııa departamentine 8 (7172) 71-60-69; 71-60-28 nemese «102» telefondaryna qońyraý shalýdy suraımyz»,-delingen Polıtsııa departamentiniń baspasóz qyzmeti taratqan aqparatta.
