Elordada Kóshi-qon jónindegi arnaıy HQKO ashylady
ASTANA. QazAqparat - Elordada sheteldikterdi tirkeý úshin arnaıy halyqqa qyzmet kórsetý ortalyǵy ashylady. Bul týraly búgin «Azamattarǵa arnalǵan Úkimet» memlekettik korporatsııasynyń basqarma tóraǵasy Abylaı Ospanov málim etti, dep habarlaıdy QazAqparat.
«Búgingi kúni biz mundaı usynysty Іshki ister mınıstrligine berdik. Astanada ilki joba retinde Mıgratsııa jónindegi arnaıy halyqqa qyzmet kórsetý ortalyǵyn iske qosqysymyz keledi. Qazirgi ýaqytta kelissózder júrgizilýde, ǵımarat tańdap alyndy. Onda memlekettik korporatsııa qyzmetkerleriniń front-keńesin ornalastyrmaqpyz. Al sheteldikterge vıza berý nemese tirkeý sheshimi kóshi-qon polıtsııasynyń qyzmetkerlerinde qalatyn bolady. Bul másele qazirgi ýaqytta talqylanýda», - dedi ol korporatsııanyń jumysyn BAQ ókilderine tanystyrý barysynda.
Onyń aıtýynsha, búgingi kúni elimizde memlekettik korporatsııanyń 350 front-keńesi jáne 630-dan astam bek-keńsesi jumys isteıdi. Olarda 22 myńǵa jýyq qyzmetker bar. Ótken jyly memlekettik korporatsııa 37 mıllıonnan astam qyzmet kórsetti, onyń 24,5 mıllıony elektrondy formatta.
