Elordada kóshege qoqys tastaǵan azamattar 446 mıllıon teńge aıyppul tólegen
ASTANA. KAZINFORM — Qoǵamdyq oryndarǵa qoqys tastaǵany úshin 13 myńnan astam adam ákimshilik jaýapkershilikke tartylǵan. Bul jóninde Astana qalasynyń Qorshaǵan ortany qorǵaý jáne tabıǵatty paıdalaný basqarmasy basshysynyń orynbasary Medet Jalpybaev málimdedi.
Ol qoǵamdyq oryndardy lastaǵandarǵa, qalanyń abattandyrý erejelerin buzǵandarǵa jáne kóliktiń terezesinen jolǵa qoqys tastaǵandarǵa aıyppul salý boıynsha 2025 jylǵy statıstıkaǵa toqtaldy.
– QR Ákimshilik quqyq buzýshylyq týraly kodeksiniń (ÁQBtK) 434-2-baby (Qoǵamdyq oryndardy lastaý) boıynsha – 13 276 quqyq buzýshy anyqtalyp, 446 mıllıon teńgeden astam somaǵa aıyppul salyndy. ÁQBtK-niń 505-baby (Qalany abattandyrý erejelerin buzý) boıynsha – 31 952 quqyq buzýshy anyqtalyp, shamamen 53 mıllıon 590 myń teńge somasynda aıyppul salyndy. ÁQBtK-niń 344-baby (Kólik quralyn paıdalana otyryp, stıhııalyq qoqys úıindilerin jasaý) boıynsha – 43 quqyq buzýshy anyqtalyp, shamamen 11 mıllıon teńge somasynda aıyppul salyndy, – dedi maman resmı saýalymyzǵa joldaǵan jaýabynda.
Sonymen birge, ol 2026 jyly 1 qańtardan qazirge deıingi derekterdi bólisti.
– Astana qalasynyń Polıtsııa departamenti usynǵan aqparatqa sáıkes, ÁQBtK-niń 434-2-baby (Qoǵamdyq oryndardy lastaý) boıynsha – 323 quqyq buzýshy anyqtalyp, 7 mıllıon 300 myń teńge somasynda aıyppul salyndy. ÁQBtK-niń 505-baby (Qalany abattandyrý erejelerin buzý) boıynsha – 18 000 quqyq buzýshy anyqtalyp, 35 mıllıon teńge somasynda aıyppul salyndy. ÁQBtK-niń 344-baby (Kólik quralyn paıdalana otyryp, stıhııalyq qoqys úıindilerin jasaý) boıynsha – 22 quqyq buzýshy anyqtalyp, shamamen 4,7 mıllıon teńge somasynda aıyppul salyndy, – dedi Medet Jalpybaev.
Aıta keteıik, buǵan deıin elordadaǵy qoqys suryptaý zaýytynda jańǵyrtý jumystary qashan aıaqtalatynyn jazǵanbyz.
