Elordada kóshe saýdasyna arnalǵan oryndar aýktsıony bastalady
ASTANA. QazAqparat - Aldaǵy dúısenbi, 28 qańtar kúni elordada kóshe saýdasyna arnalǵan oryndardy bólý aýktsıony bastalady. Bul týraly Astana qalalyq ınvestıtsııalar jáne kásipkerlikti damytý basqarmasynyń basshysy Álisher Ábdiqadyrov aıtty, dep habarlaıdy QazAqparat tilshisi.
«Ózderińiz de «1000 oryn - kóshe saýdasy» baǵdarlamasyn bilesizder. Bul jerde aýktsıon tolyqtaı onlaın rejimde júrgizilip, «blokcheın» tehnologııasy 100 paıyz ashyqtyqty qamtamasyz etedi. Endigi ýaqytta qandaı da bir faktisi aýystyryp qoıý múmkin emes», - dedi ol.
Onyń aıtýynsha, buǵan deıin aýktsıon adamdardyń qatysýymen júrgizilip kelgen bolatyn. Bul kásipkerlerge qolaısyzdyq týdyratyn jáne uzaq ýaqytty alatyn protsess edi.
«Qazirgi ýaqytta telefon arqyly tirkelip, bastapqy kepildik jarnany tóleý arqyly aýktsıonǵa qatysýǵa múmkindigi jasalyp otyr. Búgingi kúnniń sońyna deıin ótinimderdi qabyldaý aıaqtalady. Osydan eki apta buryn habarlandyrý bergen edik. Al aýktsıon dúnısendi kúni bastalady», - dedi Á.Ábdiqadyrov.
Jalpy, onyń dereginshe, 2018 jyly astanada 13 myńnan astam kásipkerlik sýbektisi tirkelgen. Olardyń ónim óndirýi 21,9 paıyzǵa artyp, 3,5 trn teńgeni quraǵan. Qyzmet jasaıtyn sýbektilerdiń sany 2019 jyldyń 1 qańtarynda 125 myńnan astam boldy. Bul ótken jyldyń sáıkes kezeńimen salystyrǵanda 28,2 paıyzǵa artyq.
