Elordada qorshaǵan ortany lastaǵany úshin tólenetin emıssııa kólemi artady
NUR-SULTAN. QazAqparat - Jańa tólemdik ózgeris tek qana zańdy tulǵalarǵa qatysty, dep habarlaıdy QazAqparat tilshisi.
«Biz tabıǵatty lastaıtyn avtokólik túrlerine tóleıtin emıssııa kólemin arttyrýdy kózdep otyrmyz. Bul tólem kerosın qoldanýshylarǵa da qatysty. Al qalǵandary sol burynǵy kúıinshe qalady. Atap aıtsaq, dızel janar-jaǵarmaıynyń 1 tonnasy úshin - 0,9 AEK, benzınniń ár tonnasy úshin - 0,66 AEK jáne kerosınniń qoldanylǵan árbir tonnasy úshin - 0,48 AEK deıingi kólemde arttyrý kózdelip otyr», - dedi Nur-Sultan qalasy qorshaǵan ortany qorǵaý jáne tabıǵat paıdalaný basqarmasynyń basshysy Musa Tanabaev qalalyq máslıhattyń otyrysynda.
Onyń málimdeýinshe, qazirgi ýaqytta dızeldiń 1 tonnasy úshin tólenetin emıssııa mólsheri - 0,63 AEK, benzın - 0,33 AEK jáne kerosın - 0,24 AEK quraıdy.
«Taǵy bir aıtyp ótetini - bul ózgeris avtokóligi bar zańdy tulǵalarǵa ǵana qatysty. Olar ár toqsan saıyn janar-jaǵarmaı materıaldaryn qoldaný boıynsha esep beredi. Mysaly, «Astana Tazalyq» JShS buryn jylyna - 6,1 mln teńge tólese, endigi ýaqytta 8,9 mln teńge tóleıtin bolady. Mundaı ózgeris engizýdegi maqsat - kompanııalardyń ekologııalyq turǵydan taza ári únemdi janar-jaǵarmaıǵa kóshýine yqpal etý», - deıdi ol.
Óz kezeginde qalalyq máslıhat depýtattary atalǵan ózgeristi biraýyzdan qoldady. Jáne ádilet mekemelerinde jasalýy tıis tirkeýden soń onyń óz kúshine enetini aıtyldy.
Jalpy, atalǵan basqarmanyń deregine súıensek, elordadaǵy qorshaǵan ortany lastaýdyń negizgi kózi - qaladaǵy JEO-1 jáne JEO-2. Olardan shyǵatyn qaldyq 25% quraıdy. Jáne 17% lastaný jeke sektorlardaǵy ot jaǵý oshaqtarynan keledi.
