Elordada koronavırýsty táýligine 70 adam juqtyrady
Bul týraly Antikor.live jobasynda Nur-Sultan qalasynyń Qoǵamdyq densaýlyq saqtaý basqarmasy basshysy Tımýr Muratov aıtty, dep habarlaıdy QazAqparat tilshisi.
«Qazirgi tańda qaladaǵy epıdemıologııalyq jaǵdaı salystyrmaly túrde alǵanda turaqty. Degenmen ınfektsııa juqtyrǵan naýqas sany kún saıyn artyp keledi. Jeltoqsan aıynda táýligine koronavırýs juqtyrýdyń 70 jańa jaǵdaıy tirkelip otyr. Infektsııalyq statsıonarlarda 174 naýqas koronavırýstan emdelip jatyr. 18 adam karantındik statsıonarda emdelýde. Jalpy alǵanda 192 adam em alýda», - deıdi Nur-Sultan qalasynyń Qoǵamdyq densaýlyq saqtaý basqarmasy basshysy Tımýr Muratov.
Onyń aıtýynsha, bıyl jeltoqsan aıynyń toǵyz kúninde 558 jańa koronavırýs ınfektsııa tirkelip otyr.
«Paıyzben salystyryp qarasaq, statsıonarlarda koronavırýspen aýyryp jatqandar sany azaıdy. Koronavırýstyń alǵashqy tolqyny kezinde biraz qıynshylyqqa tap bolyp, naýqastardy emdeýge múmkindigimiz bolmaı qalǵan edi. Ekinshi tolqynǵa daıyndyq barysynda aldymen ambýlatorlyq emhana júıesin qadaǵalap, olardyń jumysynyń jańa algorıtmin jasadyq. Barlyq emhanadaǵy fıltr kabınetteriniń jumysyn kúsheıttik», - deıdi ol.