Elordada koronavırýstan kóz jumǵan 4 adamǵa qatysty mán-jaı belgili boldy
NUR-SULTAN. QazAqparat –Nur-Sultan qalalyq qoǵamdyq densaýlyq saqtaý basqarmasynyń basshysy Sáýle Qısyqova jaqynda elordada koronavırýstan qaıtys bolǵan tórt adamǵa qatysty mán-jaıdy aıtty, dep habarlaıdy QazAqparat tilshisi.
«Sońǵy kúnderi Nur-Sultan qalasynda 4 adam koronavırýstan kóz jumdy. Birinshi jaǵdaıdaǵy analız boıynsha 47 jastaǵy er adam eki apta boıy úıinde ózi emdelgen. Ekinshi jaǵdaıda 68 jastaǵy naýqas úıinen birden statsıonarǵa jetkizildi. Úshinshi jaǵdaıda 70 jastaǵy adam BQO turǵyny ekenin anyqtaldy. Turǵylyqty jeri boıynsha kardıolog dárigerdiń baqylaýynda bolǵan. Ol klınıkaǵa jádel járdem brıgadasymen jetkizildi. Al tórtinshi jaǵdaı 59 jastaǵy er adamǵa qatysty bolyp otyr. Ol Almaty qalasynyń turǵyny ekenin belgili boldy. Naýqas dárigerlerdiń kómegine ózi júgingen», - dedi S. Qısyqova Ortalyq kommýnıkatsııalar qyzmetinde.
Onyń sózine qaraǵanda, atalǵan naýqastardyń densaýlyq jaǵdaıynyń nasharlyǵyna baılanysty olar birden jansaqtaý bólimine jatqyzyldy. Ókinishke qaraı, atqarylǵan barlyq em-dom sharalary nátıje bermedi.
Budan buryn 10 maýsymda Nur-Sultan qalasynda koronavırýstan 47, 59, 68 jáne 70 jastaǵy tórt er adam qaıtys bolǵany habarlanǵan edi.
Aıta keteıik, elordada vırýs juqtyrǵan jalpy 2 620 adam anyqtaldy. Onyń ishinde 270-i bala. 1 829 naýqas nemese 70 paıyzy jazylyp shyqty. Ókinishke qaraı, tolyq kólemde júrgizilgen medıtsınalyq kómekke qaramastan, 14 adam qaıtys boldy .
«Búginde koronavırýs ınfektsııasymen 730 naýqas aýrýhanada jatyr. Olardyń ishinde 48-iniń jaǵdaıy aýyr, sonyń arasynda 18 naýqas óte aýyr jaǵdaıda. Olardyń ókpeleri jasandy jeldetý apparatyna qosylǵan», - dedi S. Qısyqova .
