Elordada koronavırýstan qaıtys bolǵan eki adamǵa qatysty málimetter aıtyldy
NUR-SULTAN. QazAqparat – Nur-Sultan qalalyq qoǵamdyq densaýlyq saqtaý basqarmasynyń basshysy Sáýle Qısyqova koronavırýs ınfektsııasynan qaıtys bolǵan eki adam týraly aqparat berdi, dep habarlaıdy QazAqparat tilshisi.
«Nur-Sultan qalasynda koronavırýs indetinen eki adam qaıtys boldy. Osy oraıda marqumdardyń týystary men jaqyndaryna qaıǵyryp kóńil aıtamyz. Birinshi naýqas 1958 jyly týǵan áıel adam on kúndeı úıinde ózin-ózi emdegen. 31 naýryz kúni jaǵdaıy aýyrlaǵanda jedel járdem arqyly juqpaly aýrýlar aýrýhanasynyń jansaqtaý bólimine jatqyzylyp, jasandy ókpeni jeldetý apparatyna qosyldy. Jaǵdaıynyń aýyrlyǵyna baılanysty 18 sáýirde respýblıkalyq qarqyndy terapııa ortalyǵyna aýystyryldy. Emdeý hattamasyna sáıkes, naýqasqa qajetti em-dom sharalary júrgizildi. Biraq reanımatsııalyq sharalarǵa qaramastan, naýqas 13 mamyr kúni kóz jumdy», - dedi Qısyqova.
Onyń sózine qaraǵanda, ekinshi naýqas - 1977 jyly týǵan er adam. Otbasynda koronavırýs juqtyrǵan janmen jaqyn qatynasta bolǵan.
«Osy oraıda tórt kún úı karantıninde boldy. 17 sáýirde jedel járdem qyzmeti arqyly juqpaly aýrýlar aýrýhanasyna jetkizildi. Oǵan tıisti emdeý sharalary jasaldy. Alaıda jaǵdaıy aýyrlaǵandyqtan, 22 sáýirde jansaqtaý bólimine aýystyryldy. Naýqas sońǵy eki jylda qosymsha aýrýlary boıynsha emhanada tirkeýde bolǵan. 13 mamyrda qarqyndy terapııaǵa qaramastan, naýqas qaıtys boldy», - dedi basqarma basshysy.
Budan buryn habarlanǵandaı, elordada koronavırýstan eki adam kóz jumǵan edi.
